Flott endur­koma FH og Valur vann í 83 marka leik

FH lenti mest fjórum mörkum undir í seinni hálfleik, til dæmis í stöðunni 23-19, en þá komu þrjú mörk í röð frá FH sem náði svo að jafna metin í 24-24, þegar enn var korter eftir. FH-ingar komust svo fljótlega yfir og héldu naumu forskoti út leikinn.

Samkvæmt HB Statz var Jón Bjarni Ólafsson markahæstur hjá FH með 8 mörk og Garðar Ingi Sindrason skoraði 7. Hjá Stjörnunni var Hans Jörgen Ólafsson markahæstur með 9 mörk og Gauti Gunnarsson skoraði 6.

Arnór Snær og Gunnar Kári með tíu hvor

Valur var 23-19 yfir í hálfleik á Selfossi í galopnum slag. Selfyssingar mættu grimmir í seinni hálfleikinn og minnkuðu forskotið hratt. Þeim tókst svo að jafna metin í 38-38 þegar sex mínútur voru eftir en þá skoruðu Valsmenn tvö mörk í röð og enduðu á að vinna þriggja marka sigur í þessum ótrúlega markaleik.

Arnór Snær Óskarsson hefur átt góða heimkomu úr atvinnumennsku og varð markahæstur Vals með 10 mörk en Andri Finnsson skoraði 9. Hjá Selfossi var Gunnar Kári Bragason markahæstur með 10 mörk og Hannes Höskuldsson skoraði 9.

Fimmtándu umferðinni, þeirri síðustu fyrir jóla- og EM-hlé, lýkur í kvöld með leikjum KA og HK, Aftureldingar og ÍR, og Hauka og Fram. Ljóst er að FH fer í fríið í 4. sæti með 19 stig en Valur er á toppnum með 24 stig. Stjarnan er í 8. sæti með 10 stig og Selfoss með stigi minna í 10. sæti.