Opnar stað í anda Kaffi Vest í Foss­voginum

Nýverið hafa margir íbúar í Fossvogi lýst yfir áhyggjum vegna framkvæmda sem nú standa yfir í verslunarkjarnanum Grímsbæ. Í hverfisgrúppu 108 hverfis hafa farið af stað sögusagnir um að þar eigi að opna sportbar.

Sá orðrómur á ekki við nein rök að styðjast samkvæmt Auðunni Blöndal, útvarps- og sjónvarpsmanni, sem stendur að baki staðnum ásamt kærustu sinni, fyrirsætunni Rakel Þormarsdóttur.

„Konseptið er hverfisstaður, notalegur staður í hverfinu í anda Kaffi Vest og Yndisauka,“ segir Auðunn um staðinn í samtali við fréttastofu. 

„Ég er búinn að búa í Fossvoginum í tæp tíu ár og við konan saman í sjö ár og hefur alltaf fundið hvað þetta hefur vantað: Kjarni þar sem fólk getur hist, fengið sér góðan bita og átt notalega stund.“

Hvenær kviknar þessi hugmynd?

„Við erum búin að reyna í fimm eða sex ár að opna þennan stað. Við erum búin að hitta Reiti oftar en tíu sinnum. Við gáfumst bara ekki upp en fundum alltaf að þetta þyrfti að vera rétt staðsetning,“ segir hann.

„Þetta er á besta stað fyrir allt 108 hverfið þannig okkur fannst þetta algjör draumur þegar þetta var séns.“

Er komið nafn?

„Nafnið er ekki komið en það eru nokkur í hattinum,“ segir hann.

Skilur áhyggjur fólks og vill vinna í samráði við íbúa

Staðurinn verður á neðri hæð Grímsbæjar þar sem Krambúðin var áður. Núna standa yfir framkvæmdir sem munu að sögn Auðuns taka allavega þrjá mánuði.

„Það voru nokkrir búnir að vara mig við hvað þetta tekur allt langan tíma en þetta hefst að lokum,“ segir hann.

Staðurinn er með rekstrarleyfi í flokki þrjú sem gerir eigendum kleift að bjóða upp á áfengi og spila tónlist. Staðurinn verður þó hvorki skemmtistaður né sportbar að sögn Auðuns.

„Þetta þýðir að við megum vera með opið til eitt, hvort sem það verður opnunartíminn eða ekki. Það á bara eftir að koma í ljós. Við erum ekki einu sinni búin að ræða nákvæmlega hvernig við ætlum að hafa það, hvort það verður sumartími eða vetrartími,“ segir hann.

Auðunn segist skilja áhyggjur íbúa og hefur rætt við nokkra sem búa nálægt húsinu um verkefnið.

„Ég sá einhvers staðar talað um að þetta yrði Sportbar, sem þetta verður alls ekki. Stemmingin á að vera notaleg,“ segir hann.

„Til að svona staður gangi þarf hverfið að halda með honum. Þannig ég vil endilega gera þetta í samráði við þau um hvað megi betur fara og annað.“

Næstu mánuði verða því undirlagðir framkvæmdum og frekari þróun á verkefninu og nafninu. Auðunn bindur vonir við að staðurinn opni annað hvort í desember og janúar. „Og ég hef fundið það í hverfinu öll þessi ár að það eru flestir sammála um það að það vanti nákvæmlega einhvern svona stað.“