Formúla 1

Leclerc hélt ekki í við hraðann og Norris náði mögnuðum sigri

Ágúst Orri Arnarson skrifar
Lando Norris tók áhættu sem borgaði sig.
Lando Norris tók áhættu sem borgaði sig. Mark Sutton - Formula 1/Formula 1 via Getty Images

Charles Leclerc hjá Ferrari fór fyrstur af stað í ungverska kappakstrinum í Formúlu 1 en tókst ekki að halda í við hraðann hjá McLaren eða Mercedes. Áhættusamur Lando Norris hjá McLaren stökk upp um tvö sæti og stóð uppi sem sigurvegari, liðsfélagi hans Oscar Piastri varð annar en Mercedes ökuþórinn George Russell náði þriðja sætinu.

Lando Norris tók mikla áhættu með því að stoppa aðeins einu sinni á sjötíu hringja kappakstrinum, sem hefði getað endað illa fyrir hann en borgaði sig heldur betur.

Norris náði forystunni og hélt út í æsispennandi lokahringjum. Baráttan var hörð milli liðsfélaganna, Norris og Piastri, aðeins 0,6 sekúndum munaði milli þeirra en þeir voru langt á undan öllum öðrum í mark.

Þrátt fyrir að þeir séu liðsfélagar eru Norris og Piastri engir vinir. Rudy Carezzevoli/Getty Images

Á síðasta ári í Ungverjalandi samþykkti Norris að leyfa liðsfélaga sínum að taka fram úr, svo McLaren gæti grætt fleiri stig í bílasmiðakeppninni, en hann var ekki til í það þetta árið.

Enda engin ástæða til núna, McLaren er í langefsta sæti í bílasmiðakeppninni og baráttan um heimsmeistaratitil ökuþóra er milli þeirra tveggja.

Með sigrinum í Ungverjalandi minnkar Norris forskot Piastri niður í aðeins níu stig.

Formúlan tekur sér nú sumarfrí en næsta keppni verður í Hollandi þann 31. ágúst.

Akstursíþróttir

Mest lesið


Fleiri fréttir

Sjá meira


×

Mest lesið