Rigningin setti strik í reikninginn er Piastri sigraði í Belgíu

Strax í morgun bárust fréttir af því að óvíst væri hvort yrði yfir höfuð farið af stað í belgíska kappakstrinum í dag sökum rigningar.

Stuttu seinna var svo greint frá því að hætt væri að rigna og því yrði ræst á tilsettum tíma.

Í upphitunarhringnum kom þó í ljós að það var fráleitt að fara að láta ökumenn keppa við þessar aðstæður. Enn var mikið vatn á brautinni og skyggni ökumanna svo gott sem ekki neitt.

Því var kappakstrinum frestað um stutta stund og ræst á eftir öryggisbíl tæplega einni og hálfri klukkustund síðar.

Af þeim sökum fór kappaksturinn hægt af stað. Ekið var á eftir öryggisbíl fyrstu fjóra hringina, en á fyrsta hring eftir að hann fór inn nýtti Piastri sér tækifærið og tók fram úr liðsfélaga sínum, Lando Norris.

Piastri hélt forystunni allt til enda og tryggði sér sigurinn. Lando Norris kom annar í mark og Charles Leclerc á Ferrari varð þriðji.

Oscar Piastri er nú með 266 stig í efsta sæti heimsmeistaramóts ökumanna, 16 stigum meira en Norris sem situr í öðru sæti. Max Verstappen situr í þriðja sæti með 185 stig.