„Alltaf leiðinda­mál að lenda í svona“

Vísir fjallaði í gær um málið, en athygli vekur að leyfishafi KFC í Danmörku er fyrirtæki stýrt af Íslendingi. Isken ApS heitir það og forstjóri þess er hinn 52 ára Bjartmar Þrastarson. Faðir hans stofnaði KFC í Danmörku árið 1986.

Í umfjöllun danska ríkisútvarpsins er ljósi varpað á óábyrgt verklag danska arms skyndibitakeðjunnar, en þar viðgekkst að nýir merkimiðar væru prentaðir þegar ferskur, þíddur kjúklingur hafði ekki verið eldaður fyrir síðasta notkunardag. Í úttekt matvælastofnunar Danmerkur fengu tveir staðir neikvæða umsögn og allir hinir hlutlausa umsögn. Enginn fékk jákvæða umsögn.

Nýjustu vendingar í málinu eru þær að staðirnir virðast þrátt fyrir allt opnir í dag, samkvæmt DR. Höfuðstöðvar KFC í Vestur-Evrópu segja við miðilinn að þær leiti nú lagalegra leiða til að fá staðnum lokað. Þá segir að höfuðstöðvarnar hafi opnað rannsókn á meintum brotum Isken ApS gegn heilbrigðisstöðlum.

Ekki liggur fyrir hvort allir ellefu staðir landsins séu opnir þrátt fyrir að hafa verið sviptir leyfinu. 

Eftirlit meira hérlendis

Fréttastofa hafði samband við Helga Vilhjálmsson, Helga í Góu, eiganda KFC á Íslandi til tæplega 45 ára. Hann segist fylgjast með framvindu málsins líkt og aðrir, og þekkir til eigendanna úti sem hann segist standa með.

„Það er alltaf leiðindamál að lenda í svona löguðu, það er einfalt mál. Maður getur ekki gert að því hvernig fólk vinnur á vinnustöðum. Það er djobbið manns að passa þetta, þess vegna er ég yfirkóngurinn að passa þetta,“ segir Helgi. 

Hann segir reginmun á heilbrigðiseftirliti hér á landi og í Danmörku. 

„Við erum í allt öðrum pakka. Eftirlitið er svo mikið hérna heima, þetta eru tveir ólíkir hlutir.“