Líkir veiðigjaldaáformum við sóvéska eigna­upp­töku

„Ég hef aldrei verið virkur í flokkapólitík og beinist hugur minn fremur að nýsköpun og uppbyggingu atvinnulífs. Ég vil landið í byggð og blóma, þá ekki síst Vestfirði. Það krefst fjölbreyttra atvinnukosta, frelsis til athafna og öflugs og samheldins samfélags,“ segir Guðmundur í grein sem birtist á Vísi í dag.

Visin hönd ríkisstjórnarinnar ógni vestfirska efnahagsævintýrinu

Í greininni rekur Guðmundur efnahagslega sögu Vestfjarða undanfarna áratugi, sem hann segir að hafi gengið í gegnum niðurlægingar- og samdráttarskeið upp úr 1980. Svæðið hafi tekið gríðarlega við sér síðustu ár og talað sé um vestfirska efnahagsævintýrið í því sambandi.

Segir Guðmundur svo að skattaframlag Vestfjarða hafi undanfarin fimm ár verið 30 milljarðar króna, og fyrirsjáanlegt verði að næstu fimm ár verði framlagið 60 milljarðar. Við það bætist svo 40 milljarðar í aukaskattgreiðslur vegna sölu hugverka til móðurfélags Kerecis í Danmörku.

„Í þessu ljósi má búast við að næstu fimm árin verði skattaframlagið líklega um 100 milljarðar.“

 „Þennan árangur efnahagslegs vaxtar sjávarþorpanna ætlar ríkisstjórnin nú að ofurskatta og leggja sína visnu hönd yfir með íþyngjandi álögum sem á næstu árum munu minnka skattaframlag Vestfjarða frá sjávarútvegi sem og veikja byggðirnar.“

„Þessu hlýtur allt réttsýnt fólk, bæði það sem ann landsbyggðinni og þeim sem er annt um auknar tekjur til ríkissjóðs, að mótmæla kröftuglega,“ segir Guðmundur.

Beinar álögur ríkisins 91 prósent af rekstrarafkomu

Guðmundur vísar því næst í útreikninga Skattsins, þar sem greining var gerð á áhrifum veiðigjaldaáformanna á fyrirtæki í sjávarútvegi.

„Meðfylgjandi mynd sýnir hvað mun sitja eftir hjá Hraðfrystihúsinu-Gunnvöru, farsælu fyrirtæki hér fyrir vestan, til nýsköpunar og framtíðaruppbyggingar. Beinar álögur ríkisins sem hlutfall af rekstrarafkomu eru áætlaðar 91 prósent sé miðað við tillögur ríkisstjórnarinnar um tvöföldun veiðileyfagjalda.“

„Útreikningarnir sýna svo ekki verður um villst að áformum um stórauknar álögur á veiðileyfagjöld má líkja við sovéska eignaupptöku. Flestum ætti að vera ljóst að slík áform í anda Ráðstjórnar enda með ósköpum.“

Níutíu prósent kvótans hafi skipt um hendur

„Þeir sem andæfa áformum stjórnmálamanna eru sagðir gæta sérhagsmuna „stórútgerða” eða fjögurra eða fimm fjölskyldna. Slíkt tal er fjarri öllum raunveruleika.“

„Flest sjávarútvegsfyrirtæki landsins eru í grunninn fjölskyldufyrirtæki sem keyptu kvóta og veðsettu hús og híbýli til kaupanna. Fjölskyldur sem tóku áhættur í rekstri, unnu myrkranna á milli og áttu stundum ekki fyrir launum. Í sumum tilfellum fór illa og allt tapaðist,“ segir Guðmundur.

Fjölskyldur hafi með harðfylgni og vinnusemi komið undir sér fótunum aftur og áratug síðar hafi rekstur víðast hvar verið kominn í ásættanleg horf. Fjárfestingar í vinnslu og skipum auki veltu og umsvif.

„Það má ekki gleymast að 90 prósent kvótans á Íslandi hafa skipt um hendur á þennan máta, með framtaks- og vinnusemi. Fyrirhuguð ofursköttun mun draga úr framtaks- og vinnusemi.“

„Ég hvet Vestfirðinga og forsvarsmenn fyrirtækja og byggðarlaga að láta nú heyra í sér sem aldrei fyrr. Oft var þörf en nú er nauðsyn,“ segir Guðmundur Fertram.