Stakk sér til sunds með sjö há­hyrningum

Viktoría Kjartansdóttir er í sumarbústað á Hellnum, en hún birti myndband af ævintýrum mannsins á Tiktok. Hún er furðu lostinn á hegðun mannsins, sem hún veit ekki hver er.

„Mig langar að vita hvort hann hafi verið að padela, eða hvort hann hafi séð háhyrningana og ákveðið svo að fara út í,“ segir hún.

Hún segir að maðurinn hafi líka sést á brettinu úti á sjó í gærkvöldi. Hún þekkir ekki til mannsins og veit ekki hvar hann hefst við.

„Mig langar svo að vita hver þetta er. Langar að vita hvort þetta sé Íslendingur eða útlendingur. Langar líka að vita hvort hann hafi dottið óvart út í sjó eða hvort hann sé svona ævintýragjarn,“ segir hún.

Viktoría er oft í bústað á Hellnum, en hún segir að háhyrningar séu mjög tíðir gestir á svæðinu, þeir sjáist nánast á hverjum degi.

Hún telur að hjörðin sem maðurinn synti með í kvöld hafi talið um sjö háhyrninga.