„Þetta var ekki gert til að flækja, alls ekki“

Eins og fram hefur komið í fréttum síðustu vikuna hefur regluverk sem sett var af síðustu ríkisstjórn leikið veitingamenn grátt en það kveður á um fjögurra vikna auglýsinga- og umsagnarskyldu til að fá starfsleyfi. Jóhann Páll Jóhansson umhverfisráðherra sagði við fréttastofu í dag að breytingar á því regluverki tækju gildi í vikunni.

Guðlaugur Þór Þórðarson, þáverandi umhverfisráðherra, setti reglugerðina árið 2024 en hann segir að þær breytingar hafi verið gerðar með einföldun að leiðarljósi. 

„Þetta var ekki gert til að flækja, alls ekki,“ segir Guðlaugur Þór, sem er í dag þingmaður Sjálfstæðisflokksins, í samtali við fréttastofu.  Þarna sé annað hvort um að ræða sérstaka túlkun heilbrigðiseftirlits Reykjavíkur á reglugerðinni, sem tók gildi 2022, eða að mistök hafi verið gerð við innleiðingu hennar.

„Markmið var alltaf að einfalda, einfalda, einfalda.“

Vinna sem hafi þegar verið hafin

Nýlega hafa veitingamenn kvartað undan hollustuháttareglugerð sem tók gildi í ágúst 2024 þar sem kveðið er á um fjögurra vikna auglýsingaskyldu fyrir allan starfsleyfisskyldan rekstur auk fjögurra vikna úrvinnslutíma. Reglugerðin tók gildi rúmlega tveimur árum eftir að hún var lögð fram í samráðsgátt 2022.

Guðlaugur segir að sú vinna sem standi yfir í ráðuneytinu í dag um að einfalda regluverk sé framhald af vinnu sem hafi hafist þegar hann var umhverfisráðherra og segist fagna því að því sé haldið áfram.

Í því samhengi nefnir ráðherrann fyrrverandi að hann hafi skrifað undir reglugerð sem gerði 47 atvinnugreinar skráningaskyldar frekar en starfsleyfisskyldar, þar á meðal bifreiðaverksætði og steypustöðvar. Sú breyting náði þó ekki til veitingareksturs en nú hyggst arftaki hans, Jóhann Páll, gera 23 atvinnugreinar til viðbótar skráningarskyldar frekar en starfsleyfisskyldar.

Vöruðu við breytingunm

Heilbrigðiseftirlitsstofnanir vöruðu við því í umsögnum sínum um heilsuháttarreglugerð 2022 að regluverkið myndi flækja fyrir hollustuháttafyrirtækjum með því að gera þeim skylt að bíða í fjórar vikru eftir að auglýsingatími rynni út.

Heilbrigðiseftirlit Reykjavíkur taldi breytingarnar „óþarfa flækjustigi“ og taldi enga ástæðu fyrir að auglýsa stafsleyfi enda ættu þau öll að standast kröfur reglugerðarinnar sem og kröfur í gildandi skipulagi og hafa samþykkar teikningar hjá viðkomandi byggingarfulltrúa. Hins vegar mætti skoða hvort viss starfsleyfi fyrirtækja samkvæmt áhættumati ættu ekki að vera auglýsingaskyld, til að mynda vissar heilbrigðisstofnanir og jafnvel fyrirtæki í eða við íbúðabyggð sem eru líkleg til að valda ónæði, sum sé skemmtistaðir.

Heilbrigðiseftirlit Suðurlands sagði benti á að mögulega væri verð að tefja afgreiðslu mála að óþörfu með því að setja inn auglýsingaskyldu á hollustuháttafyrirtækjum „sem hafa fram að þessu verið undanþegin kynningu – er ekki nóg að búið sé að afla samþykkis skipulags- og byggingafulltrúa og gera úttekt áður en leyfið er veitt?“ spurði eftirlitið. „Þetta er hreinasti óþarfi.“