Aron og Bjarki ung­verskir meistarar á kostnað Janusar

Hvorki Aron né Bjarki voru í leikmannahópi Veszprém í dag, eins og greint var frá hér á Vísi fyrir leik.

Þrátt fyrir það geta þeir félagar líklega fagnað vel og innilega, sérstaklega í ljósi þess að leikurinn markar endalok glæsts handboltaferils Arons Pálmarssonar. Aron hafði sjálfur greint frá því að þetta yrði hans síðasta tímabil.

Eftir að hafa tryggt sér oddaleik með sigri á heimavelli í síðasta leik áttu gestirnir í Pick Szeged, með Janus Daða Smárason innaborðs, í stökustu vandræðum með að hemja sóknarleik Veszprém í dag.

Liðið komst yfir í upphafi leiks og leiddi 1-3 eftir um fimm mínútna leik, en eftir það höfðu heimamenn í Veszprém yfirhöndina. Munurinn á liðunum varð þó aldrei meiri en þrjú mörk fyrir hlé og staðan í hálfleik var 17-15, Veszprém í vil.

Í síðari hálfleik skiptust liðin á að hafa forystuna fyrstu mínúturnar, en heimamenn náðu svo þriggja marka forystu í stöðunni 25-22 þegar rétt rúmur stundarfjórðungur var til leiksloka.

Mest náðu heimamenn sex marka forystu í stöðunni 29-23. Það bil náðu Janus og félagar aldrei að brúa og niðurstaðan varð að lokum þriggja marka sigur Veszprém, 34-31.

Veszprém er því ungverskur meistari, en gestirnir í Pick Szeged þurfa að gera sér silfrið að góðu.