Bara þrír sem fá að heim­sækja Michael Schumacher

Michael Schumacher hefur ekki sést á almannafæri síðan að hann slasaðist illa á höfði í skíðaslysi í Ölpunum fyrir tólf árum síðan. Fjölskyldan passar vel upp á að ástand hans sé einkamál hennar.

Corinna, eiginkona Michael Schumacher, sér um hann ásamt læknaliði á heimili þeirra við Genfarvatn í Sviss.

Schumacher fékk mjög slæmt höfuðhögg þegar hann datt á stein á fullri ferð á skíðum. Honum var haldið sofandi í marga mánuði eftir slysið. Hann þurfti að gangast undir tvær aðgerðir. Það tókst að bjarga lífi hans en lítið er vitað um hvert ástand hans væri í raun og veru.

Allt frá slysinu árið 2013 hefur verið mikill áhugi á því að komast að því hvert sér raunverulegt ástand hans en Corinnu og fjölskyldu hefur tekist að passa upp á sinn mann. Blaðamenn og aðrir í gróðavon hafa reynt ýmislegt til að komast yfir upplýsingar eða myndir.

Það eru þó nokkrir sem fjölskyldan treystir og þeir hafa haldið trúnaði allan þennan tíma.

The Telegraph hefur nú komist að því hvaða þrír einstaklingar utan fjölskyldunnar fái að heimsækja Michael Schumacher.

Jean Todt, franskur framkvæmdastjóri í formúlunni, er sagður vera einn þeirra. Þeir unnu mikið saman þegar Schumacher gekk best hjá Ferrari.

Ross Brawn, sem stýrði Ferrari liðinu til fimm heimsmeistaratitla frá 2000 til 2004 er sagður vera annar.

Þriðji og síðasti maðurinn sem fær að heimsækja sjöfalda heimsmeistarann er Gerhard Berger, fyrrum ástralskur formúlu 1 ökumaður, sem fór frá því að vera keppinautur hans í að vera náinn fjölskylduvinur.