Ein­kunnir Ís­lands: Cecilía best en náum ekki að halda hreinu

Íslenska liðið mátti þola 0-2 tap í leik kvöldsins, en þetta er tíundi leikurinn í röð án sigurs hjá stelpunum okkar.

Ísland fékk fín færi í fyrri hálfleik til að komast yfir í leiknum, en með vindinn í fangið í seinni hálfleik reyndust Frakkarnir of stór biti.

Cecilía Rán Rúnarsdóttir, markvörður [7]

Átti stórkostlega vörslu á 13. mínútu þegar hún nýtti alla sentímetrana sína til að teygja sig í skot sem stefndi í fjærhornið. Var heilt yfir örugg í sínum aðgerðum og greip vel inn í þegar liðið þurfti á henni að halda, en gat lítið gert til að koma í veg fyrir mörk Frakka.

Guðný Árnadóttir, hægri bakvörður [4]

Átti í vandræðum framan af leik. Frakkar sóttu mikið upp vinstri kantinn og Guðný átti oft og tíðum í erfiðleikum. Hefði mögulega þurft meiri hjálparvörn. Fann þó taktinn betur og betur eftir því sem leið á leikinn. Fyrra mark Frakka kom svo hennar megin, en þar hefði átt að dæma rangstöðu.

Glódís Perla Viggósdóttir, miðvörður [5]

Fékk dauðafæri til að koma íslenska liðinu yfir í fyrri hálfleik, en setti boltann framhjá. Spurning hvort hún hafi átt að gera betur í öðru marki Frakka þegar hún lætur teyma sig út úr vörninni.

Ingibjörg Sigurðardóttir, miðvörður [7]

Mætti reið til leiks í kvöld. Hvað það var sem reitti hana til reiði veit ég ekki, en Ingibjörg nýtti reiðina vel. Lítið við hana að sakast í mörkum gestanna.

Guðrún Arnardóttir, vinstri bakvörður [6]

Hafði ekki jafn mikið að gera og kollegi sinn í hægri bakverðinum framan af leik. Franska liðið sótti þó meira upp hægri kantinn í seinni hálfleik og þá var Guðrún sterk í sínum aðgerðum.

Alexandra Jóhannsdóttir, miðjumaður [6]

Engin flugeldasýning frá Alexöndru, en gerði vel þennan klukkutíma sem hún var á vellinum.

Karólína Lea Vilhjálmsdóttir, miðjumaður [6]

Enn einn leikurinn þar sem föst leikatriði hennar eru að skapa hættu. Er með frábæra spyrnugetu og var óheppin að skora ekki eða leggja upp í fyrri hálfleik. Dró af henni eftir hlé þegar íslenska liðið spilaði með vindinn í fangið.

Dagný Brynjarsdóttir, miðjumaður [6]

Heilt yfir fín frammistaða hjá Dagnýju sem er að komast aftur inn í liðið. Mikilvæg fyrir Ísland þegar hún er upp á sitt besta.

Hlín Eiríksdóttir, hægri vængmaður [6]

Hjlóp mikið og skilaði fínni varnarvinnu miðað við stöðu á vellinum, en vantaði meira fram á við og var tekin af velli þegar um stundarfjórðungur var til leiksloka.

Sveindís Jane Jónsdóttir, framherji [4]

Hefur oft sýnt meira í íslensku treyjunni. Reyndi að ógna franska markinu með sínum ótrúlega hraða, en frönsku varnarmennirnir vissu vel að það þyrfti að stoppa hana. Dró svo verulega af henni í seinni hálfleik.

Agla María Albertsdóttir, vinstri vængmaður [5]

Átti fínt skot sem fór yfir markið í fyrri hálfleik. Annars heldur viðburðarlítill leikur hjá Öglu Maríu.

Varamenn:

Sandra María Jessen, kom inn á fyrir Öglu Maríu Albertsdóttur á 62. mínútu [5]

Barðist vel eftir að hún kom inn á, en fékk úr litlu að moða í fremstu víglínu með vindinn í fangið.

Hildur Antonsdóttir, kom inn á fyrir Alexöndru Jóhannsdóttur á 62. mínútu [5]

Gerði vel stuttu eftir að hún kom inn á þegar hún kom í veg fyrir að Frakkar slyppu í gegn.

Berglind Ágústsdóttir, kom inn á fyrir Karólínu Leu Vilhjálmsdóttur á 74. mínútu [4]

Fyrra mark Frakka kom um leið og Berglind og Fanndís komu inn af bekknum. Svo sem ekkert við þær að sakast, en erfitt að koma inn á við þessar aðstæður.

Fanndís Friðriksdóttir, kom inn á fyrir Hlín Eiríksdóttur á 74. mínútu [4]

Í rauninni lítið annað að segja um frammistöði Fanndísar en hefur verið sagt um frammistöðu Berglindar.

Sædís Rún Heiðarsdóttir, kom inn á fyrir Guðnýju Árnadóttur á 85. mínútu

Spilaði ekki nóg til að fá einkunn.