Kristín til að­stoðar for­sætis­ráð­herra

Þetta kemur fram í tilkynningu á vef Stjórnarráðsins. 

Kristín er með BA-próf í íslensku frá Háskóla Íslands en hún hefur starfað á fréttastofu Stöðvar 2, Vísis og Bylgjunnar frá árinu 2017. Þar hefur hún m.a. sinnt fréttaskrifum á Vísi, flutt fréttir í sjónvarpi og útvarpi, haft umsjón með fréttatímum, stýrt umræðuþáttum og sinnt dagskrárgerð sem einn umsjónarmanna dægurmálaþáttarins Ísland í dag. Þá var hún áður pistlahöfundur á Fréttablaðinu og hefur setið í stjórn Blaðamannafélags Íslands frá 2023.

Kristín er annar fréttamaðurinn á fréttastofu Stöðvar 2, Vísis og Bylgjunnar sem er ráðinn til aðstoðar nýrri ríkisstjórn Samfylkingar, Viðreisnar og Flokks fólksins. Tilkynnt var um ráðningu Heimis Más Péturssonar til Flokks fólksins á þriðjudag.

Ólafur Kjaran Árnason starfar áfram sem aðstoðarmaður forsætisráðherra en hann tók til starfa þann 23. desember síðastliðinn. Fram að því var Ólafur aðstoðarmaður Kristrúnar Frostadóttur sem formanns Samfylkingarinnar. Ólafur er með meistarapróf í hagfræði frá Cambridge-háskóla. Hann var áður sjálfstæður ráðgjafi og hefur starfað með ýmsum stjórnmálamönnum.

Kristín hefur lokið störfum á fréttastofunni og mun hefja störf sem aðstoðarmaður Kristrúnar í lok febrúar.