Bíp Bíp Bíp

„Reykskynjari kom í veg fyrir mikinn eldsvoða í fimm hæða fjölbýlishúsi í Hafnarfirðinum í nótt. Í ljós kom að kviknað hafði í borði út frá kertaskreytingu og þegar reykskynjari vakti íbúa íbúðarinnar blasti við þeim varðeldur í miðri stofunni. Íbúarnir sprautuðu úr slökkvitæki á eldinn en það dugði ekki til og var kominn mikill reykur í stofuna þannig að þeir gerðu það rétta forðuðu sér út”

Þegar líða fer að jólum fjölgar fréttum sem þessum af eldsvoðum þar sem reykskynjari bjargar mannslífum og kemur í veg fyrir stórbruna. Það er þess vegna sem alþjóðlegur dagur reykskynjarans er í byrjun desember ár hvert en þá er fólk hvatt til að huga að eldvörnum á heimilum sínum. Tveir eða fleiri reykskynjarar eiga að vera á hverju heimili og best er að hafa þá í öllum rýmum.

Ódýrasta öryggistækið

Reykskynjarar eru ódýr öryggistæki og skerandi vælið í þeim getur bjargað mannslífum. Það er lang skynsamlegast að hafa reykskynjara í öllum rýmum og ef möguleiki er þá er best að hafa þá samtengda þannig að hljóðmerki komi frá þeim öllum ef eldur kemur upp. Reykskynjarar eiga að minnsta kosti að vera framan við eða í hverju svefnherbergi og á hverri hæð á heimilinu. Staðsetjið reykskynjara í lofti, 30-50 cm frá vegg. Ganga þarf úr skugga um að reykskynjarar heimilisins séu í lagi og skipta um rafhlöður í þeim þegar þeir gefa frá sér hljóðmerki. Líftími rafhlaða er mismunandi og erfitt að alhæfa um endingu þeirra.

Hvað getur þú gert?

Árlega er fólk hvatt til að kanna stöðuna á öllum reykskynjurum heimilisins með því einfaldlega að ýta á takkann á hverjum einasta reykskynjara heimilisins. Ef reykskynjarinn er í lagi þá pípir hann við það að ýtt sé á takkann og gefur það til kynna að hann virki. Ef ekkert hljóð heyrist er reykskynjarinn líklega batteríslaus og því gagnslaus með öllu, þá þarf að skipta um batterí hið snarasta. Þegar nýtt batterí er komið í reykskynjarann má svo ekki gleyma að prófa hvort hann virki ekki örugglega. Hefur þú setið í sumarhúsi eða vaknað upp við píp á mínútu fresti? Það er mjög líklega reykskynjari að láta vita að rafhlaðan sé að verða búin.

Eldvarnir um jólin

Samkvæmt gögnum slökkviliðs höfuðborgarsvæðisins verður breyting á útköllum vegna elds yfir hátíðirnar þar sem tíðni eykst á kvöldin og næturnar samanborið við restina af árinu. Orsakir elds geta verið margvíslegar en á ársgrundvelli má rekja 21% þeirra til rafmagns og 20% vegna eldamennsku. Þetta beinir sjónum okkar að hleðslutækjum, fjöltengjum og jólaseríum. Gætum þess að ofhlaða ekki millistykki og hlaða rafhlaupahjól fjarri flóttaleið og eldfimum efnum. Förum varlega í eldhúsinu, gleymum ekki pottum eða pönnum á hellu og höfum eldvarnarteppi við höndina.

Kertaljós og kósí

Förum gætilega með opinn eld og loga þegar við lýsum upp skammdegið. Það getur verið hættulegt að vera með kerti við opinn glugga og nálægt gluggatjöldum eða þurru greni. Þarna er samankomin hin eldfima þrenning : logi, súrefni og brennanlegt efni.

Eins og fyrr segir þá er góð regla að byrja aðventuna á því að prófa reykskynjara, láta skoða slökkvitækin okkar og ganga úr skugga um að eldvarnarteppið sé sýnilegt í eldhúsinu. Farið varlega á aðventunni og njótið hennar örugglega með eldvarnirnar í lagi.

Höfundur er sérfræðingur í forvörnum hjá Verði tryggingum.