Gert að greiða leigu fyrir af­not af „Hafnar­fjarðar­hreysinu“

Konan greiddi 200 þúsund krónur í leigu fyrir íbúð í Hafnarfirði síðasta vetur og fram á vor. Konan vakti athygli á ástandi íbúðarinnar í viðtali við Stöð 2 fyrr á árinu. Þar sagðist hún óttast um líf sitt.

„Ég er bara í rúst. Ég er bara skíthrædd hérna. Ég er skíthrædd. Þetta er ömurlegt að geta ekki vaskað upp, þvegið þvott, farið í sturtu. Ég er svo stressuð að ég er fara að grenja núna,“ sagði Sigurbjörg Hlöðversdóttir í viðtali við Stöð 2.

Árni Stefán Árnason lögfræðingur og leigusalinn sem um er rætt svaraði konunni í viðtali daginn eftir og sagði margt vanta í frásögn hennar. Hann viðurkenndi að húsnæðið væri ekki hæft til langtímaleigu.

Sjá einnig: „Þetta hús­næði er ekki leigu­hæft, og það viður­kenni ég“

Í úrskurði nefndarinnar kemur fram að leigusalinn hafi krafist þess að konunni yrði gert að greiða hálfa milljón í leigu, auk vaxta, fyrir tímabilið frá miðjum febrúar og til lok aprílmánaðar á þessu ári. Þá krafðist hans þess einnig að konunni verði gert að rýma húsnæðið og afhenda honum það í því ástandi sem það eigi að vera eftir endurbætur hans.

Í máli konunnar kom fram að hún teldi húsnæðið óíbúðarhæft og að leigusalinn hafi vanefnd skyldur sínar til að koma húsnæðinu í lag. Þá hafi þrisvar verið brotist inn í húsið og rafmagn tekið af húsinu. Þá hafi Heilbrigðiseftirlitið lýst því yfir að húsnæðið væri óíbúðarhæft og Slökkvilið höfuðborgarsvæðisins ekki leyft búsetu vegna brunahættu út frá ófrágengnu rafmagni.

Gerði ekki athugasemdir þegar hún flutti inn

Leigusalinn bendir á að niðurstöður heilbrigðiseftirlitsins hafi legið fyrir fjórum mánuðum eftir að konan flutti inn og segir að álykta megi að konan hafi sjálf gert húsnæðið óíbúðarhæft með sóðaskap og skemmdarverkum. Konan hafi ekki gert neinar athugasemdir um ástand húsnæðisins þegar hún tók við því.

Þá kemur fram í úrskurði nefndarinnar að aðdragandi þess að konan leigði húsið hafi verið sá að leigusalinn hafi auglýst það til leigu fyrir Grindvíkinga eftir að kom til rýmingar í bæjarfélaginu þann 10. nóvember í fyrra. Það hafi verið auglýst til tímabundinnar notkunar. Þegar þau gerði leigusamning hafi verið gerður munnlegur samningur um endurbætur en þó án nokkurra tímamarka. Eldhús og baðherbergi hafi verið gert klárt nánast sama dag og konan flutti inn. Konunni hafi þetta verið allt ljóst. 

Í úrskurði er einnig fjallað um það að konan hafi lagt til að samningurinn yrði endurnýjaður þegar honum lauk og þá til lengri tíma. Leigusalinn segir konuna hafa gengið hart á eftir þessu sem konan hafnar. Leigusalinn segir yfirlýsingu Slökkviliðs uppspuna og að hann hafi aldrei tekið rafmagnið af húsinu. 

Í niðurstöðu nefndarinnar segir að í ljósi þess að konan gerði leigusamning við manninn vitandi um ástand hússins og vegna þess að hún hafi sóst eftir því að framlengja leigusamning hafni nefndin kröfu hennar. Hvað varðar kröfu leigusalans um að konan rými húsið segir að ekki komi til þess að afgreiða kröfuna því konan sé farin. 

Hvað varðar leiguna sem hún greiddi ekki segir óumdeilt að hún greiddi aðeins helming leigunnar, eða hundrað þúsund krónur. Þau hafi gert með sér samning um að hún myndi annast viðhald en yrði að framvísa reikningum. Hún hafi aðeins framvísað reikningum upp á 35 þúsund krónur og því samþykkir nefndin að hún eigi að greiða leigusalanum það sem eftir er af leigunni, 65 þúsund krónur. 

Ekki er fallist á kröfu leigusalans um að konan greiði leigu fyrir marsmánuð en samþykkt krafa um að hún greiði leigu fyrir aprílmánuð. Hún hafi haldið áfram að búa í húsnæðinu þrátt fyrir að leigusalinn hafi verið tilbúinn til að losa hana undan samningi.