Miklar tíma­móta­á­kvarðanir í sam­göngu­sátt­mála

„Já, það er mikill léttir. Þetta var bara gleðidagur í gær. Fá botn í þessa stefnumótun ríkis og sveitarfélaga á höfuðborgarsvæðinu,“ segir Bergþóra Þorkelsdóttir vegamálastjóri.

Óvissu um risaframkvæmdir upp á 311 milljarða á næstu 16 árum hefur verið eytt, þótt nú þegar hafi verið ráðist í töluverðar framkvæmdir samkvæmt samgöngusáttmálanum sem fyrst var undirritaður árið 2019.

Framlenging Arnarnesvegar um tæpa tvo kílómetra úr Salahverfi í Kópavogi er hluti af samgöngusáttmálanum á höfuðborgarsvæðinu. Vegurinn heldur áfram þaðan og kemur niður hinum megin við Fellahverfið í Breiðholti.

„Við áætlum að Arnarnesveginum ljúki haustið 2026. Það er bara stutt í það,“ segir vegamálastjóri. En auk akvegarins verða einnig lagðir 2,6 kílómetrar af hjóla- og göngustígum með þremur hjólabrúm.

Ein stærstu tímamótin felast síðan í ákvörðun um að leggja jarðgöng undir Miklubraut allt frá Skeifunni að Landspítalanum og suður undir Kringlumýrarbraut frá gatnamótunum við Miklubraut.

„Það er rosalega mikilvægt að það skuli vera búið að taka þessa ákvörðun. Okkar vinna hefur fram að þessu snúist um að meta þessa valkosti. Annars vegar stokk og hins vegar jarðgöng. Það er alveg ljóst að mjög fljótlega eftir að við byrjuðum þá vinnu fóru að renna tvær grímur á menn, varðandi stokkinn,“ segir Bergþóra. Enda hefði sú framkvæmd haft í för með sér gífurlegt rask á löngum framkvæmdatíma á fjölförnustu samgönguæð borgarinnar.

Bergþóra segir að nú geti mikil undirbúnings- og skipulagsvinna hafist áður en ráðist verði í framkvæmdir á seinni hluta áætlunarinnar.

„Niðurstaðan var líka sú að þessi lausn er betri fyrir alla samgöngumáta. Við erum að fá meiri framfarir fyrir alla samgöngumáta í þessari lausn en þeirri sem upphaflega var skoðuð,“ segir vegamálastjóri. Þar með breytist allt landslagið ofanjarðar með rólegri borgargötu, borgarlínu ásamt göngu og hjólastígum.

Og þá eru það umbyltingarnar á Sæbraut sem fer að hluta í stokk og tengist síðan áformum um Sundabraut.

„Það verkefni er komið lengra. Forhönnun er búinn og mat á umhverfisáhrifum klárast nú fyrir jól. Síðan er verið að vinna samhliða að skipulagsmálum. Og við þurfum að horfa til þess að kaupa þarna upp land því það þarf að gera hjáleið þegar þetta fer svo í framkvæmd.“

Hvenær sérðu það verkefni hugsanlega fara af stað?

„Við reiknum með að það fari af stað árið 2027,“ segir Bergþóra Þorkelsdóttir.