Fjölskyldusameiningar strandi á Bjarna: „Ég trúi á mennskuna í fólki“

Margrét Helga Erlingsdóttir, fréttamaður Stöðvar 2, ræddi við Guðmund Inga Guðbrandsson, félags- og vinnumálaráðherra, um stöðuna á fjölskyldusameiningum Palestínubúa á Íslandi í kvöldfréttum. Viðtalið hefst eftir eina mínútu og fimmtíu sekúndur í klippunni hér að neðan.

Vanti diplómatíska aðkomu úr utanríkisráðuneytinu

Gætir þú varpað ljósi á það hver staðan er akkúrat núna og reynt að vera eins nákvæmur og þú getur?

„Ég held í fyrsta lagi að það sé afskaplega mikilvægt að við gerum allt sem í okkar valdi stendur til þess að aðstoða fólkið til að koma hingað heim til Íslands. Þess vegna var mikilvægt að Útlendingastofnun setti fjölskyldusameiningar í forgang, í rauninni eitt Norðurlandanna því hin hafa ekki verið að samþykkja fjölskyldusameiningar eftir 7. október,“ sagði Guðmundur.

„Við höfum í félagsmálaráðuneytinu gengið frá því að Alþjóðafólksflutningastofnunin muni flytja fólkið heim frá Kairó í Egyptalandi, þaðan sem þau starfrækja sína starfstöð. En þetta strandar á landamærunum, strandar á því að fólk kemst ekki yfir landamærin. Þar þarf diplómatíska aðkoma og hana er eingöngu að finna í utanríkisráðuneytinu,“ sagði hann.

„Þannig þetta kallar á aðkomu utanríkisráðuneytisins og ég veit að þau hafa verið að skoða með hvaða hætti væri hægt að gera þetta. Mér finnst afskaplega brýnt að þessi mál fari að skýrast sem allra allra fyrst og við getum farið að aðstoða fólkið við að koma heima.“

Ætlar engum í ríkisstjórninni að vilja ekki aðstoða fólk

Dómsmálaráðherra sagði í viðtali um helgina eitthvað á þá leið að það væri ekki búið að taka ákvörðun hvort það yrði yfir höfuð farið í að bjarga fólkinu og aukinheldur að þeim bæri engin lagaleg skylda til þess. Manni finnst eins og það séu pínu misvísandi skoðanir milli ólíkra ríkisstjórnarflokka. Hvað veldur?

„Eins og ég segi, utanríkisráðuneytið hefur verið að skoða með hvaða hætti megi gera þetta. Ég legg ríka áherslu á það,“ sagði hann.

„Ég ætla engum í ríkisstjórninni að vilja ekki aðstoða fólk í vanda við að komast heim. Þannig vonandi sjáum við þetta gerast allra fyrst. Ég hef lagt áherslu á það. Allt tilbúið mín megin og ég mun halda áfram að ýta á það að þetta geti gerst,“ sagði Guðmundur.

Trúir á mennskuna í samstarfsfélögum sínum

Þessi orðræða og tónn í Sjálfstæðisflokknum. Ertu bjartsýnn á að þau fari í þennan diplómatíska leiðangur?

„Ég trúi á mennskuna í fólki og vonast til að við getum gengið í þetta sem allra allra fyrst og ættum auðvitað að vera búin að því nú þegar. Talandi um angist fólks sem þarf að horfa upp á sína nákomnustu í þeim aðstæðum sem þarna eru á Gasasvæðinu, sem hefur verið lýst sem helvíti á jörðu. Ég held við séum öll þar að vilja reyna draga úr áhyggjum fólks,“ sagði Guðmundur.

„Líka af því það skiptir máli að fólkið komi sem fyrst hingað. Til þess að við björgum sem flestum en líka vegna þess að þá er það ekki í eins slæmri andlegri stöðu eins og það annars væri eftir því sem það þarf að bíða lengur og lengur og sama á þá við um þau sem bíða eftir sínum fjölskyldumeðlimum hér heima,“ sagði hann.

Það er ríkisstjórnarfundur á morgun. Ætlarðu að þrýsta á utanríkisráðherra eða yfir höfuð ræða þetta mál eitthvað á fundinum?

„Þessi mál hafa verið rædd tvisvar sinnum í ráðherranefnd um útlendinga og flóttafólk og líka inni í ríkisstjórn. Þannig málin hafa verið á dagskrá og verða áfram á dagskrá,“ sagði Guðmundur að lokum.