Krefjast þess að fá að bjóða sig fram til for­seta

„Við í Ung Framsókn höfum ekki enn heyrt sannfærandi rök fyrir því að meina ungu fólki að bjóða sig fram til embættis forseta Íslands. Það sama unga fólk getur verið kjörið í sveitarstjórnir, til Alþingis og jafnvel gegnt stöðu ráðherra. Yngri einstaklingur gæti því verið handhafi forsetavalds í fjarveru forseta, þar sem ekki er sett slík aldurstakmörkum á embætti forsætisráðherra eða forseta Alþingis,“ segir í aðsendri grein samtakanna á vef Vísis í dag.

Í greininni er bent á að ekki séu gerðar margar kröfur til forsetaframbjóðanda. Það sé gerð krafa um íslenskan ríkisborgararétt, kosningarétt og að hann fái 1.500 meðmæli.

„Hvorki er gerð krafa um fasta búsetu á Íslandi né hreint sakavottorð,“ segir í greininni og þar spurt hvort embættinu væri ekki vottuð meiri virðing með því að krefjast fleiri meðmæla en 1.500 við hverju framboði.

Þá segir að í stefnu flokks Framsóknar, sem var samþykkt árið 2021, segir að flokkurinn vilji að öll réttindi sem tengist fullorðinsaldri verði virk við 18 ára aldur. Þá hafi Ung Framsókn ályktað að ungt Framsóknarfólk vilji að öll aldurstengd réttindi fullorðinna verði endurskoðuð eftir 18 ára aldur með það í huga að afnema aldurstakmarkanir.

Óásættanlegar hindranir

Þá krefst stjórn Sambands ungra Framsóknarmanna þess að við mögulega endurskoðun á stjórnarskrá verði unnið að því að fella úr gildi þessa reglu.

„Það er óásættanlegt að í nútíma lýðræðisríki séu settar fram slíkar hindranir í veg fólks sem hyggur að forsetaframboði, sem virðast aðeins byggðar á aldursfordómum. Treystum íslensku þjóðinni til þess að meta hæfi frambjóðenda sjálf á kjörstað, hún hefur staðið sig vel í því verkefni til þessa.“