Kirkju­garðurinn að fyllast og verið að undir­búa næstu skref

Sigríður Ingvarsdóttir, bæjarstjóri Fjallabyggðar, segir að verið að skoða hentuga staðsetningu fyrir kirkjugarð í Ólafsfirði þar sem sérstaklega verði litið á lóðir við Garðsveg og svo við Brimnes.

„Við erum bara að vanda til verka, hvar við munum byggja upp framtíðarkirkjugarð í Ólafsfirði. Eins og staðan er víða þá fer núverandi kirkjugarður bráðum að fyllast. Það er víst gangur lífsins. Við endum öll einhvers staðar. Það þarf góðan undirbúning varðandi það að taka nýja kirkjugarða í notkun. Fólk hefur mjög ákveðnar skoðanir á því hvar kirkjugarðar eigi að rísa svo við erum því í þéttri samvinnu við heimafólk og sóknarnefnd um framtíðarstaðsetningu,“ segir Sigríður.

Tveir kostir til skoðunar

Á fundi skipulags- og umhverfisnefndar Fjallabyggðar fyrr í mánuðinum var samþykkt að skoða betur lóðir við Garðsveg annars vegar og Brimnes hins vegar. Greina þurfi svæðin og kortleggja betur þörf undir fyrirhugaða notkun og er tæknideild sveitarfélagsins falið að vinna málið áfram og funda með sóknarnefnd þegar frumhönnun á báðum svæðum sé lokið.

Fram kemur að sóknarnefnd Ólafsfjarðarprestakalls telji svæðið við Garðsveg vænlegasta kostinn.

Svæðið við Garðsveg sem skoða á nánar er í þeim hluta bæjarins sem næst er Héðinsfjarðargöngum. 

Í skýrslu tæknideildar segir að styrkleiki þess svæðis sé að það sé aðgengilegt, friðsælt, stutt frá þéttbýlinu og stækkunarmöguleikar séu fyrir hendi. Á móti komi að keyra þurfi efni í svæðið til að hækka það. Þá kunni það að skapa vandræði að svæðið sé blautt, í nokkurri hæð fyrir sjávarmáli og þá þyrfti mögulega að hafa samráð við Framfarafélag Ólafsfjarðar sem hafi verið með hugmyndir um uppbyggingu á svæðinu.

Hægt að fegra innkomuna í bæinn

Svæðið við Brimnes sem einnig á að skoða er 2,5 hektari að stærð og að finna í hinum enda bæjarins, sunnan megin við Ólafsfjarðarveg þegar keyrt er inn í bæinn eftir að komið er út úr Múlagöngum. Í skýrslunni segir að svæðið sé innan þéttbýlis og einungis um átta hundrað metra frá Ólafsfjarðarkirkju.

„Með uppbyggingu manar eða skjólbeltis meðfram þjóðveginum er hægt að búa til friðsælt svæði og skjól. Tún, skurðir, moldarhaugar og vegir eru innan svæðis. Ráðast þyrfti strax í uppbyggingu á stórum hluta svæðisins til að minnka áhrif landnotkunar fyrri ára á heildarútlit svæðisins. Með uppbyggingu á svæðinu er um leið verið að fegra innkomuna í bæinn. Svæðið er í leigu skv. lóðarleigusamning frá 2009, ráðast þyrfti í innköllun á hluta lóðarinnar,“ segir í skýrslunni.

Tekinn í notkun eftir þrjú til fjögur ár

Sigríður segir að eftir að framkvæmdum sé lokið á því svæði sem verði fyrir valinu þurfi jarðvegurinn að vera óhreyfður í tvö ár áður en hann er tekinn í notkun. 

„Því er hugsanlegt að byrjað verði að jarða í nýjum garði eftir þrjú til fjögur ár. Það er enn eitthvað pláss eftir í garðinum í Ólafsfirði og svo eru að sjálfsögðu einhverjir búnir að taka pláss frá. En eins og ég segi þá þarf að vera tímanlega í því að undirbúa nýjan garð.“

Sigríður segir samhliða vinnunni í Ólafsfirði sé sömuleiðis sé verið að vinna að stækkun kirkjugarðsins innst í Siglufirði.