Enn aukast flækjur Lindarhvolsmálsins á Alþingi

Lindarhvoll var félag sem stofnað var utan um eignir sem ríkið leysti til sín þegar bankarnir urðu gjaldþrota eftir hrun. Félagið seldi síðan eignirnar og hafa þingmenn og fleiri viljað fá nánari upplýsingar um hvernig að því var staðið. Fyrir liggja greinargerð og síðan skýrsla frá tveimur ríkisendurskoðendum um málið.

Þingmenn meirihlutans í stjórnskipunar- og eftirlitsnefnd vilja að Sigurður Þórðarson fyrrverandi settur ríkisendurskoðandi verði kallaður til opins fundar hjá nefndinni til að ræða við hann um málefni Lindarhvols. Hann skilaði greinargerð til Alþingis um málið sem forseti þingsins vill ekki að verði birt. Þingmenn sem vilja að hún verði birt segja erfitt að ræða málið ef ekki megi birta greinargerðina.

Stjórnskipunar og eftirlitsnefnd fundaði um þessa óvenjulegu flækju í dag. Þórunn Sveinbjarnardóttir formaður nefndarinnar og þingmaður Samfylkingarinnar gerir ráð fyrir að fyrrverandi settur, fyrrverandi skipaður og núverandi ríkisendurskoðandi komi allir fyrir nefndina. Ekki væri hins vegar víst að þingsköp leyfðu að fyrrverandi embættismaður væri kallaður á opinn fund nefndarinnar.

„Þetta er lagaþræta af bestu gerð. En við ætlum að biðja skrifstofu Alþingis að hjálpa okkur að skera úr um það,“ segir Þórunn.

Greinargerðin umdeilda er í læstum skáp og geta þingmenn lesið hana í lokuðu herbergi án þess að taka með sér skriffæri, síma eða myndavélar. Þingmenn sem vilja birta greinargerðina segja erfitt að ræða við höfund greinargerðar á opnum nefndarfundi ef ekki megi vitna í hana.

Um hvað á hann að tala á þeim fundi og ef hann talar um þessa greinargerð er þá einhver ástæða til að hún sé læst inn í skáp öllu lengur?

„Það finnst mér ekki. Um það er meirihlutinn ósammála okkur í minnihlutanum. Að sjálfsögðu á að birta greinargerðina. Eins og forsætisnefnd hafði ákveðið að gera fyrir næstum ári. Ég veit ekki nákvæmlega hvernig sá fundur verður. Hvort að fyrrverandi settur ríkisendurskoðandi ætlar þá að segja okkur hvað er í henni eða ekki. Það varpar hins vegar ljósi á það hversu fáránleg þessi staða er í rauninni,“ segir formaður nefndarinnar.

Fleiri nefndarmenn annarra flokka í minnihlutanum taka undir þetta. Sigmar Guðmundsson fulltrúi Viðreisnar í nefndinni segist ekki sjá hvernig Sigurður Þórðarson fyrrverandi settur ríkisendurskoðandi geti rætt innihald greinargerðar sem ekki megi birta. Til að ræða Lindarhvolsmálið þurfi þingmenn einnig að geta rætt vinnu Sigurðar.

„Ég held að það sé þannig að meirihluti þingmanna vilji að greinargerðin verði birt. Að forseti fari bara ofur einfaldlega eftir þeim lögfræðiálitum og fari eftir skýrum og einbeittum vilja setts ríkisendurskoðanda um að greinargerðin verði birt og þetta verði rætt fyrir opnum tjöldum,“ segir Sigmar.

Þórunn segir að nú verði beðið álits skrifstofu Alþingis um heimildir í þingsköpum til að kalla fyrrverandi embættismenn til opins fundar.

Getur eitt mál orðið mikið fáránlegra?

„Ég held varla,“ segir Þórunn Sveinbjarnardóttir.