Fótbolti

Rosengård enn með pálmann í höndunum eftir sigur­mark í blá­lokin

Runólfur Trausti Þórhallsson skrifar
Toppliðið vann dramatískan sigur í dag.
Toppliðið vann dramatískan sigur í dag. Rosengård

Það munaði minnstu að titilbaráttan í sænsku úrvalsdeildinni í fótbolta hefði opnast upp á gátt þegar Guðrún Arnarsdóttir og stöllur hennar í Rosengård voru við það að gera jafntefli við Vittsjö á heimavelli. Sigurmark í uppbótartíma þýðir að liðið er þó enn með þriggja stiga forystu á Kristianstad á toppi deildarinnar.

Kristianstad vann öruggan 4-0 sigur á Djurgården og setti þar með mikla pressu á topplið Rosengård. Amanda Andradóttir spilaði allan leikinn í liði Kristianstad og nældi sér í gult spjald í fyrri hálfleik. Emelía Óskarsdóttir spilaði svo síðasta stundarfjórðunginn .

Guðrún var á sínum stað í miðverðinum þegar Rosengård fékk Vittsjö í heimsókn. Eftir að komast 1-0 yfir þá lenti toppliðið 2-1 undir áður en flautað var til loka fyrri hálfleiks. Staðan var áfram 2-1 gestunum í vil allt þangað til á 81. mínútu þegar jöfnunarmarkið kom loks. 

Það var svo þegar þrjár mínútur voru komnar fram yfir venjulegan leiktíma sem Rosengård kom knettinum í netið og tryggði sér dramatískan 3-2 sigur.  Guðrún og félagar eru því með 51 stig á meðan lið Elísabetar Gunnarsdóttur er í öðru sæti með 48 stig.

Liðin mætast á heimavelli Kristianstad þann 23. október í leik sem gæti skipt sköpum í titilbaráttunni.

Fótbolti Sænski boltinn

Mest lesið


Fleiri fréttir

Sjá meira


×

Mest lesið