Goðsögn hjá Breiðabliki fallin frá

Einar var sæmdur gullmerki Breiðablik þegar hann varð sjötugur í fyrra en félagið segir hann hafa átt hvað mestan þátt að skapa þann góða anda sem ríkt hafi í íþróttahúsinu Smáranum frá upphafi. Hvunndagshetja í orðsins fyllstu merkingu.

Einar lést þann 13. febrúar, langt fyrir aldur fram eins og segir í minningarorðum á heimasíðu Breiðabliks. Einar flutti í Kópavoginn fyrir um fjörutíu árum og byrjaði strax ásamt konu sinni Ásdísi að taka virkan þátt í félagsstörfum en börn þeirra æfðu íþróttir hjá félaginu.

Einar lét einkum til sín taka um langt um árabil sem sjálfboðaliði í starfi hjá knattspyrnudeild félagsins. Var hann í þeim góða hópi fólks sem sem sá um að koma Gull- & silfurmótinu, forvera Símamótsins, á legg. Mótið er elsta og umfangsmesta knattspyrnumót sem haldið er fyrir stúlkur hérlendis. Einar starfaði við Símamótið óslitið síðan.

Einar var jafnframt umsjónarmaður yngri flokka drengja um árabil og sat ennfremur í meistaraflokksráði karla um tíma. Frá árinu 1991 varð hann starfsmaður félagsins við íþróttamannvirkin í Smáranum, fyrst við gervigrasvöllin þar sem hann starfaði með Jóni Inga Ragnarssyni, og síðar við íþróttahúsið Smárann sem vígt var haustið 1994. Hann starfaði óslitið hjá félaginu uns hann lét af störfum 27. febrúar 2020, daginn fyrir 70 ára afmælisdaginn, eftir 29 ára starf.

„Óhætt er að segja að Einar hafi í starfi sínu í Smáranum verið réttur maður á réttum stað. Frábær samstarfsmaður, ósérhlífinn, þjónustulundaður með afbrigðum og alveg sérlega laginn að umgangast börn og unglinga. Sannkallað ljúfmenni með hjartað á réttum stað, ætið reiðubúinn að leiðbeina og leiðrétta smávægilegar yfirsjónir smáfólks, sem kannski skildi skóna eftir á röngum stað, lét ekki ruslið í rulsatunnuna, eða gleymdi handklæðinu heima,“ segir á heimasíðu Breiðabliks.

Einar hafi jafnan haft góð ráð, full af húmor á takteinum fyrir þessa skjólstæðinga sína, þegar þeir hafi verið útaf sporinu.

„Þessi ráð voru reyndar fæst fengin úr Biblíunni, en þeim mun minnisstæðari fyrir þiggjendurna, sem sumir vitna í þau enn.“

Góður vitnisburður um hvað Einar hafi verið vel kynntur í sínu starfi séu þær fjölmörgu kveðjur sem honum bárust á sjötugsafmæli sínu frá fjölda Breiðabliksfólks, jafnt afreks- og námsfólki erlendis, sem iðkendum hér heima, fyrr og nú.

„Við sama tækifæri var Einar enn fremur sæmdur Gullmerki Breiðabliks í viðurkenningarskyni fyrir framlag hans til félagsins. Það er margs að minnast síðan leiðir Einars og Breiðabliks lágu saman, enda hefur á þessum tíma orðið algjör bylting í starfi og aðstöðu félagsins. Félagið margfaldast að stærð og mannvirkin sömuleiðis. Á þessum breytingatímum hefur Einar ásamt öðru starfsfólki félagsins átt hvað mestan þátt í því að skapa þann góða anda sem ríkt hefur í Smáranum frá upphafi,“ segir á vefsíðu Breiðabliks.