„Það væri á­byrgðar­leysi að reyna ekki að halda skóla­starfi gangandi“

„Það er auðvitað þannig að aðstæðurnar eru breytilegar og ég held að mikið af skólum geti farið af stað, alveg sama hvort það eru leik-, grunn- eða framhaldsskólar, og það eru allir að gera sitt besta í því, enda vitum við að skólastofnanirnar eru gríðarlega mikilvægar. Þetta er ekki bara menntun, heldur er þetta fastinn í lífi margra barna,“ sagði Ásmundur Einar Daðason, mennta- og barnamálaráðherra í samtali við fréttastofu í dag.

Hann bendir á að Sameinuðu þjóðirnar hafi lagt ríka áherslu á að skólum yrði haldið opnum eins mikið og kostur væri, þeim yrði lokað síðast og þeir opnaðir fyrst.

„Af því að menn vita hversu mikilvægt þetta er fyrir börn og ungmenni, að geta tekið þátt í reglulegu starfi.“

Þegar fréttastofa ræddi við Ásmund Einar var hann nýkominn af samráðsfundi nýstofnaðs samráðsvettvangs þeirra aðila sem koma að skólastarfi. Hann sagðist eiga von á að skólahald gæti víða farið af stað með reglubundnum hætti, þó sums staðar yrðu einhverjar takmarkanir.

„Verkefnið fram undan er að reyna að halda skólum opnum og gangandi, og við munum síðan þurfa að glíma við ýmis vandamál sem því tengjast. Það verður verkefni þessa nýja samráðsvettvangs, að taka til þeirra vandamála.“

Ráðherrann segir að hinn nýi samráðsvettvangur muni funda daglega um stöðu mála í skólakerfinu og taka á vandamálum sem upp kunni að koma.

„Vegna þess að sameiginlega teljum við að við getum haldið ótrúlega mörgum skólum opnum og gangandi,“ segir Ásmundur Einar.

Nágrannalönd í sömu stöðu

Aðspurður hvort hann óttaðist ekki að aukin útbreiðsla kórónuveirusmita myndi einfaldlega valda því að skólastarfi yrði fljótlega sjálfhætt eftir að það hæfist, sagði Ásmundur Einar að öll nágrannalönd Íslands væru að glíma við sama vandamálið.

„Við erum nýbúin að fá samantekt frá utanríkisráðuneytinu um skólahald í öllum helstu löndum sem við berum okkur saman við. Þar eru allir að reyna að setja skólastarf af stað með eins reglulegum hætti og mögulegt er. Af hverju? Jú, vegna þess sem ég rakti hér áðan,“ sagði Ásmundur Einar og ítrekaði þannig mikilvægi þess fyrir börn og ungmenni að halda rútínu.

„Börn hafa fært mjög miklar fórnir í Covid-faraldrinum og það er gríðarlega mikilvægt að skólum sé haldið gangandi eins og kostur er.“

Heiðarlegur með áskoranirnar sem bíða

Ásmundur Einar sagði þá mögulegt að hætta þyrfti skólastarfi í einhverjum skólum, á einhverjum tímapunkti. Raunar væru mjög miklar líkur á því að slík staða kæmi upp.

„En það væri ábyrgðarleysi að reyna ekki að halda skólastarfi gangandi,“ segir Ásmundur Einar og kveður alla hagaðila sem koma að skólastarfi taka undir þá afstöðu.

Hann sagði að víða um heim væru félagslegar afleiðingar þess á börn að mæta ekki í skóla og taka ekki þátt í daglegu lífi. Því væri um mikið hagsmunamál að ræða.

„En það verður áskorun og það er bara heiðarlegt að viðurkenna það.“

Önnur lönd bjóði ekki upp á bólusetningar barna 

Þann 10. janúar er ráðgert að hefja bólusetningar fyrir börn á aldrinum fimm til ellefu ára, tæpri viku eftir að skólahald hefst. 

Aðspurður hvort ekki hefði átt að bíða þar til búið væri að bjóða upp á bólusetningu þess hóps benti Ásmundur á að nágrannalönd Íslands væru ekki að fara að bjóða upp á bólusetningu fyrir börn, en ætluðu samt að halda skólum opnum.

„Síðan fara þær bólusetningar af stað fyrir þær fjölskyldur og þau börn sem það vilja, en engu að síður þarf skólastarfið að vera gangandi og það á að vera grundvallarforsenda að við gerum það með þeim hætti sem við getum.“