Smitrakningarteymið breytir um taktík

Jóhann Björn Skúlason, yfirmaður teymisins, segir teymið vera að skipta yfir í nýja taktík í ljósi aukinnar útbreiðslu og þróaðri tækni. Símtölin eru ekki talin nauðsynleg í hverju tilviki og því verður stuðst við sjálfvirka spurningalista í einhverjum mæli í staðinn.

„Þetta er náttúrulega gríðarlegt álag sem kemur núna á okkur af föstum þunga, þannig að við erum núna að reyna að laga okkur að því. 

Við tókum í gagnið nú fyrir jólin sjálfvirkan spurningalista sem við sendum á alla og hann er að hjálpa okkur við að minnka álagið hjá okkur. En síðan er viðbúið ef álagið heldur áfram að aukast að við þurfum að draga úr símtölum, þannig að það fái ekki allir sem greinast jákvæðir símtal frá okkur,“ segir Jóhann Björn í samtali við fréttastofu.

Sóttkví eitthvað sem virkar

Sóttvarnalæknir hefur tekið fyrir að á þessari stundu verði hætt að styðjast við sóttkví og einangrun nú þegar omíkron virðist valda minni alvarlegum veikindum, eins og Suður-Afríkumenn hafa gert. En sannleikurinn er sá að sögn Jóhanns í smitrakningarteyminu að 255 í sóttkví við greiningu þýðir 255 sem voru ekki að smita frá sér.

„Sóttkví er eitthvað sem virkar til að hamla útbreiðslunni. Þannig að ég held að hún verði áfram mikilvæg eins og komið er, alla vega,“ segir Jóhann. 

Þótt sums staðar sé þetta orðið þannig að fólk jafnvel hlífi vinum sínum við að nefna þá og setja í sóttkví, séu sumir svo samviskusamir að þeir hafa sjálfir samband við teymið þegar þeir lendi í þeirri stöðu. Gefa sig raunar fram. 

Steinunn Bergs, hjúkrunarfræðingur í teyminu, segir þolinmæðina hjá fólki sem smitast mikla en að í ljósi mikils fjölda þurfi að forgangsraða símtölum.

„Við forgangsröðum innanlandssmitum sem greinast utan sóttkvíar, þá sem við sjáum að svara ekki spurningalistanum, við viljum ná til þeirra af því að við viljum kortleggja þeirra ferðir og aðstoða við það,“ segir Steinunn.

Staðan almennt

Á meðan smitrakningarteymið heldur ótrautt áfram, verður umræðan um takmarkanirnar sem þau þurfa að framfylgja sífellt hvassari. Í héraðsdómi í dag var aðalmeðferð í máli fimm einkennalausra covid-sjúklinga sem hafa þurft að sæta einangrun síðustu viku, en telja það úrræði ekki lögmætt. 

Niðurstaða fæst í þessu máli á allra næstu dögum en fyrri dómsmál af sama toga hafa fallið sóttvarnalækni í vil og ákvarðanir hans um frelsisskerðingar verið dæmdar lögmætar.

Farsóttarhúsin eru enn troðfull. Þar eru rétt undir 100 manns á biðlista - og verið að forgangsraða umkomulausum ferðamönnum. Þá er unnið að varanlegri lausn á plássleysinu.

Þórólfur Guðnason sóttvarnalæknir segist ekki vera með það sérstaklega til skoðunar að herða aðgerðir en við bíðum í bili með öndina í hálsinum yfir því hvort sjúkrahúsinnlögnum fjölgi verulega, en það byrjar svo sem ekki vel, því að í gær lögðust tíu inn á sjúkrahús.

Sóttvarnalæknir sagði í samtali við fréttastofu í morgun:

„Ég myndi nú ekki segja að við getum verið að fagna einu eða neinu og ég held að við eigum frekar að líta á það þannig að við gætum átt eftir að sjá fleiri innlagnir af völdum omíkron. Það tekur eina til tvær vikur að skila sér inn á spítalann. Sá tími er að fara í hönd núna.“