Kennir vaxta­lækkunum um hækkun hús­næðis­verðs

Í grein í nýjasta tölublaði Vísbendingar, sem er vikurit um viðskipti og efnahagsmál á vegum Kjarnans, segir Gylfi Zoega að ekki sé hægt að kenna lóðaskorti og skipulagsklúðri um hækkun húsnæðisverðs.

Þá segir Gylfi að vaxtalækkanir leiði til verðhækkunar á öllum eignum. Það eigi einnig að auka eftirspurn eftir eignum og hvetja fyrirtæki til aukinna fjárfestinga.

Hann segir ákvörðun Seðlabankans um að lækka vexti hafa verið tekna til þess að mæta stöðunni vegna heimsfaraldurs Covid-19. Faraldurinn hafi valdið samdrætti í útflutningi ferðaþjónustu og því hafi verið nauðsynlegt að auka eftirspurn eftir eignum.

Gylfi segir þá peningastefnu hafa valdið þeirri miklu hækkun húsnæðisverðs sem orðið hefur undanfarið. Hann á sæti í peningastefnunefnd Seðlabankans.

Því sé „alls ekki“ hægt að kenna skipulagsmálum sveitarfélaga um hækkunina.