Tuttugu aðgerðir - Ekkert kjaftæði

Píratar leggja sérstaka áherslu á aðgerðir í loftslagsmálum og var stefna flokksins talin sú metnaðarfyllsta af Ungum umhverfissinnum. Aðgerðir gegn loftslagsbreytingum eru tækifæri til góðra breytinga á samfélaginu - baráttan gegn loftslagsbreytingum er á sama tíma baráttan fyrir sanngjarnari heimi, samfélagi sem tekur meira tillit til fólks og náttúru.

Nýsköpun er mikilvægur kjarni í loftslagsaðgerðum. Árangur okkar í loftslagsmálum veltur m.a. á því að ótal grænir sprotar nái að spretta. Þess vegna eru Píratar með framsækna nýsköpunarstefnu í 20 liðum, sem hljómar svona í mjög stuttu máli:

1. Stórauka stuðning við uppbyggingu og rekstur þróunarsetra.
2. Einfalda stofnun, skattaumhverfi og rekstur nýsköpunarfyrirtækja.
3. Einfalda fjármögnun nýsköpunarfyrirtækja.
4. Áhersla á nýsköpun á öllum sviðum samfélagsins, ekki bara nýsköpun sem byggir á hátækni.
5. Heildrænna, aðgengilegra, sveigjanlegra og kvikara styrkjaumhverfi.
6. Stórauka fjármagn til ýmissa styrktar- og nýsköpunarsjóða.
7. Stuðningur við nýsköpunarfyrirtæki á öllum stigum vaxtar.
8. Gera vistkerfi nýsköpunar aðlaðandi fyrir alþjóðlega frumkvöðla.
9. Aukinn stuðningur við alþjóðlega sókn nýsköpunarfyrirtækja.
10. Gera atvinnustarfsemi á Íslandi aðlaðandi fyrir alþjóðleg fyrirtæki.
11. Setja á fót alþjóðlega miðstöð þekkingar á sviði umhverfis- og loftslagsmála.
12. Stofna Nýsköpunarráð sem leiðir vinnu við eflingu vistkerfis nýsköpunar á Íslandi.
13. Tryggja fræðslu og þátttöku í nýsköpun á öllum stigum menntakerfisins.
14. Styðja uppbyggingu Vísindagarða og styrkja tengsl atvinnulífsins við rannsóknir og frumkvöðlastarf innan háskólanna.
15. Hvatning til atvinnulausra einstaklinga að taka þátt í nýsköpun.
16. Nýsköpun og stafræn umbylting verði sett á oddinn innan opinbera geirans.
17. Aukin símenntun í takt við tækni- og samfélagsbreytingar.
18. Áhersla á útboð áskorana í stað fyrirfram skilgreindra lausna í opinberum innkaupum.
19. Áhersla á aukið gagnsæi, opin gögn og frjálsan hugbúnað í stjórnsýslu.
20. Byggja ekki aðeins upp sterkt frumkvöðlastarf, heldur líka grænt, skapandi og lifandi samfélag sem er hvetjandi til nýsköpunar alls staðar.

Með nýsköpunarstefnu, sem má nálgast hér í heild sinni, sem spilar saman við loftslagsáherslur, menntakerfi og verkalýðsmál getum við stefnt að sjálfbæru samfélagi fyrir framtíðina. Vöxum út úr loftslagskrísunni sem sterkara og betra samfélag. Framsýni - Ekkert kjaftæði.

Höfundur er þingmaður Pírata og á öðru sæti flokksins í Reykjavíkurkjördæmi norður.