Að minnsta kosti 97 greindust smitaðir af veirunni

Samkvæmt tölum á covid.is í morgun greindust minnst 57 smitaðir af veirunni í gær. Fréttastofu barst póstur frá upplýsingafulltrúa Almannavarna um klukkan ellefu þar sem tilgreint var að vegna bilunar hafi ekki náðst að færa inn réttar tölur á covid.is í morgun. 

Tölur gærdagsins verða uppfærðar á covid.is klukkan 11 á morgun en samkvæmt tilkynningunni munu rúmlega 40 bætast við þá tölu sem var sett inn á covid.is í morgun. Það gerir að minnsta kosti 97 manns. 

Einn greindist við landamærin í gær.

Af þeim sem greindust í gær, samkvæmt covid.is, greindust 34 við einkennasýnatöku og 22 í sóttkvíar- og handahófsskimun. Þá voru 26 í sóttkví við greiningu og 31 utan sóttkvíar af þessum fyrstu 57.

Alls eru nú 1.367 í einangrun, 2.101 í sóttkví og 976 í skimunarsóttkví.

Einn til viðbótar lagður inn á gjörgæslu

Einn til viðbótar var lagður inn á gjörgæslu í gær. Í gær voru tveir inniliggjandi á gjörgæslu, báðir í öndunarvél. Alls eru nú 24 á sjúkrahúsi með Covid-19 samkvæmt covid.is og virðist sem þrír hafi verið lagðir inn í gær en nokkuð misræmi hefur þó verið á milli upplýsinga frá Landspítalanum um innlagnir og upplýsinga á covid.is undanfarið.

Meirihluti þeirra sem greindust um helgina voru bólusettir

Greint var frá því í gær að 106 hafi greinst smitaðir af veirunni á sunnudag en af þeim voru 67 bólusettir og 35 óbólusettir. Inn í þann útreikning vantar fjóra upp í 106 en svo virðist sem bólusetningar-staða þeirra sé óþekkt miðað við tölur á covid.is. Upplýsingar um hlutfall bólusettra af þeim sem greindust smitaðir eru uppfærðar fyrir klukkan 16 á virkum dögum og lágu þessar upplýsingar því ekki fyrir í gær þegar greint var frá tölum.

Sama staða var uppi um smit sem greindust á föstudag og laugardag en upplýsingar um hlutfall bólusettra voru uppfærðar á covid.is í gær. Af þeim 57 sem greindust smitaðir á laugardag voru 29 bólusettir og 26 óbólusettir.

Þá greindust 119 smitaðir á föstudag en af þeim eru 69 bólusettir, 48 óbólusettir og tveir hálfbólusettir.

Fréttin var uppfærð klukkan 11:13.