Hættu lífi sínu fyrir sjálfsmynd við Dettifoss

Arnar Þór Hafþórsson átti leið um Dettifoss í gær þegar honum bar fyrir sjónir tvær manneskjur við ystu brún fossins. Honum sýndist að um karlmann og konu væri að ræða.

„Þau voru að taka myndir og fóru þarna mjög tæpt út á klettabrúnina,“ segir Arnar Þór í viðtali við Vísi. Þá segir hann að þau hafi beygt sig niður og sett hendurnar ofan í fossinn.

Þá vekur einnig athygli að leiðin sem gulklæddu vinirnir keyrðu upp að fossinum er merkt ófær. En Arnar Þór segir að fólkið hafi staldrað við á hættusvæðinu í að minnsta kosti klukkustund.

Arnar Þór birti myndskeið af atvikinu inni á Facebook-hópnum Bakland ferðaþjónustunnar og vekur myndskeiðið mikinn óhug.