„Ég er alveg af­slöppuð með þessa niður­­­stöðu“

Sig­ríður sóttist eftir öðru sæti á lista flokksins í öðru Reykja­víkur­kjör­dæmanna en til þess að ná því þyrfti hún að enda í þriðja eða fjórða sæti í próf­kjörinu. Eins og er er hún í áttunda sæti og yrði væntan­lega boðið fjórða sætið á lista annars kjördæmisins.

Spurð hvort hún myndi þiggja fjórða sæti segir hún: „Nú veit ég ekki einu sinni hvernig kjör­nefnd metur þetta og svona þannig ég get engu svarað um það. Og það er nú ekki einu sinni búið að telja helming at­kvæða.“

Á ekki von á að listinn breytist mikið

Þegar fyrstu tölur voru birtar klukkan 19 voru rúm­lega fimm­tán hundruð at­kvæði talin og var Sig­ríður þá í 8. sæti. Engar breytingar urðu á listanum eftir að aðrar tölur voru kynntar klukkan 21 en þá höfðu rúm­lega 3.100 at­kvæði verið talin. Um 7.500 tóku þátt í próf­kjörinu.

„Það yrðu von­brigði ef þetta verður niður­staðan. En ég var svo sem undir allt búin og við sem tökum þátt í próf­kjöri við bara unum niður­stöðum próf­kjöra, þau eru sú leið sem við Sjálf­stæðis­menn höfum til að velja á lista,“ segir Sig­ríður við Vísi.

Spurð hvort hún sé von­góð um að færast ofar á listanum eftir því sem fleiri at­kvæði verða talin segir hún: „Ég á ekkert von á því að þetta breytist mikið eða ég hef bara ekki hug­mynd um það. En þetta er bara niður­staða, ég uni henni og er alveg af­slöppuð með þessa niður­stöðu.“

Hóf kjörtímabilið sem ráðherra

Sig­ríður hefur verið fyrsti þing­maður Reykja­víkur­kjör­dæmis suður á yfir­standandi kjör­tíma­bili. Hún hóf kjör­tíma­bilið sem dóms­mála­ráð­herra ríkis­stjórnarinnar áður en hún sagði af sér em­bætti vegna Lands­réttar­málsins í mars 2019.

Sjá einnig: Sigríður Andersen stígur til hliðar.

Nú er hins vegar allt út­lit fyrir að hún hverfi af þingi eftir kjör­tíma­bilið. Sjálf­stæðis­flokkurinn náði sam­tals inn fimm mönnum á þing í Reykja­víkur­kjör­dæmunum tveimur eftir síðustu kosningar. Þrír þeirra voru í Reykja­vík norður en tveir, þar á meðan Sig­ríður, í Reykja­vík suður.

Ef hún hafnar í áttunda sæti í próf­kjörinu og tekur fjórða sæti á lista er ljóst að Sjálf­stæðis­flokkurinn þarf að bæta við sig ansi miklu fylgi til að hún eigi mögu­leika á að halda sér á þingi.

Tveir aðstoðarmenn gætu náð á þing

Guð­laugur Þór Þórðar­son utan­ríkis­ráð­herra leiðir próf­kjörs­bar­áttuna með hundrað at­kvæða for­skot á Ás­laugu Örnu Sigur­björns­dóttur dóms­mála­ráð­herra þegar tæpur helmingur at­kvæða hefur verið talinn.

Flokkurinn gæti þá náð tveimur ný­liðum inn á þing ef listi próf­kjörsins breytist ekki með næstu tölum og svipað hlut­fall Reyk­víkinga á­kveður að greiða flokknum at­kvæði sitt í komandi þing­kosningum. Diljá Mist Einars­dóttir, að­stoðar­maður Guð­laugs, er í þriðja sæti í próf­kjörinu og fengi því að öllu ó­breyttu annað sæti í öðru Reykja­víkur­kjör­dæminu. Það er nokkuð öruggt þing­sæti hjá Sjálf­stæðis­flokknum í Reykja­vík.

Hildur Sverris­dóttir, að­stoðar­maður ferða­mála-, iðnaðar- og ný­sköpunar­ráð­herra er þá í fimmta sæti í próf­kjörinu eins og er. Henni yrði þá boðið þriðja sæti á lista í öðru kjör­dæmanna en það er bar­áttu­sæti hjá flokknum, sem náði þremur mönnum inn í Reykja­vík norður í síðustu þing­kosningum.