Framlengir núgildandi takmarkanir um eina viku

Þórólfur Guðnason sóttvarnalæknir lagði til að staldrað yrði við í eina til tvær vikur til að ná aðeins betur stjórn á stöðu faraldursins innanlands en Svandís ákvað að framlengja núgildandi aðgerðir um eina viku. Þetta sagði hún að loknum ríkisstjórnarfundi í dag.

Svandís telur að forsendur verði til þess að taka skref til afléttingar á aðgerðum innanlands í næstu viku í samræmi við áætlanir stjórnvalda. Tekur hún þar undir það sem sóttvarnalæknir sagði í minnisblaði sínu til ráðherra. 

„Þó að vel hafi gengið að halda faraldrinum í skefjum hér að undanförnu þá tel ég ráðlegt að fara varlega í allar afléttingar á takmörkunum innanlands þannig að ekki komi bakslag í útbreiðslu sýkinga. Hins vegar eru, að öllum líkindum, allar forsendur til þess að hægt verði að ráðast í frekari afléttingar á komandi vikum,“ segir í minnisblaði Þórólfs.

Muni líklega hefja bólusetningu með slembiúrtaki

Svandís sagði það mjög jákvætt að smit hafi fyrst og fremst verið að greinast í sóttkví undanfarna daga. Þá hafi bólusetning gengið vel og tekið fram úr áætlunum ríkisstjórnarinnar. Svandís vonast til að geta haldið áfram að aflétta aðgerðum innanlands sem fyrst.

Ákvörðun um hvort farið verði í slembiúrtak í bólusetningum verður tekin á allra næstu dögum en niðurstöður Íslenskrar erfðagreiningar benda til að með þeim hætti verði hægt að ná hjarðónæmi fyrr. 

Að sögn Svandísar verður að öllum líkindum ákveðið að fara dreift í aldurshópana eftir að bólusetningu forgangshópa lýkur. Samanborið við núverandi áætlun gæti slík aðferð að jafnaði flýtt eða seinkað bólusetningu einstaklinga um tvær vikur. 

Núgildandi takmarkanir

Áfram mun almennt vera tuttugu manna hámarksfjöldi í hverju rými út 12. maí næstkomandi. Sund- og baðstöðum og heilsu- og líkamsræktarstöðvum er heimilt að taka á móti helmingi af leyfilegum hámarksfjölda gesta, auk þess sem íþróttaæfingar og -keppnir barna og fullorðinna eru heimilar án áhorfenda.

Sviðslistir, þar með talið kórastarf, eru heimilar með allt að 50 manns á sviði og 100 sitjandi gestum í hverju hólfi, auk annarra skilyrða. Hámarksfjöldi við athafnir trú- og lífsskoðunarfélaga eru 30 manns en 100 manns mega vera viðstaddir útfarir.

Veitingastaðir, skemmtistaðir og krár mega hafa opið til klukkan 21 og hafa að hámarki 30 gesti í rými með 2 metra nálægðarmörkum. Allir gestir þurfa að hafa yfirgefið staðinn klukkan 22.

Fréttin hefur verið uppfærð.