Aron segist vera að toppa og fagnar því að komast í erfiðari deild

Hafnfirðingurinn hefur skrifað undir þriggja ára samning við Álaborg og gengur í raðir félagsins frá Barcelona í sumar.

Yfirburðir Börsunga heima fyrir eru gríðarlega miklir en spænska úrvalsdeildin má muna sinn fífil fegurri. Barcelona tryggði sér spænska meistaratitilinn í fyrradag, í ellefta skiptið í röð, en liðið vinnur nánast alla deildarleiki sína með miklum mun.

Danska úrvalsdeildin er mun sterkari en sú spænska og Aron segist þurfa á því að halda að spila fleiri krefjandi leiki. 

„Það er í raun engin keppni í deildinni hérna. Deildarleikir skipta ekki eins miklu máli því miður. Ég finn að ég þarf á þessu að halda, að fá fleiri stóra leiki. Ég tel mig vera á þeim stað á ferlinum að ég er að toppa og þá vil ég fá að sýna það oftar en í nokkrum leikjum yfir tímabilið og að það sé pressa að standa sig. Það gerist of sjaldan hérna,“ sagði Aron við Ríkharð Óskar Guðnason.

„Deildin í Danmörku er mjög góð, mjög sterk, og svo er stefnan sett á að fara langt í Evrópu,“ bætti Aron við.

Hann segir að hann verði líklega notaður sem leikstjórnandi hjá Álaborg, sérstaklega eftir að Mikkel Hansen kemur sumarið 2022.

„Mér finnst líklegt að þeir séu ekki að fara að láta mig og Mikkel berjast um sömu stöðu. Mér finnst líklegra að ég verði meira á miðjunni, allavega þegar hann kemur,“ sagði Aron.

„Það er til mikils ætlast af mér, hvort sem það er á miðju eða í skyttu. Ég hef spilað báðar þessar stöður með landsliði og félagsliðum og það skiptir mig ekki máli. En þeir ætlast til að ég skili mínu í hverjum leik. Með því að ná í mig ætla þeir að taka stærra skref í átt að Final Four [í Meistaradeild Evrópu]. Ég tek þeirri áskorun fagnandi.“