Óska eftir bólusetningu fyrir íslenskt afreksíþróttafólk

„Við minntum á okkur í lok árs og heilbrigðisyfirvöld eru alveg meðvituð um okkar óskir, um að hugað sé líka að afreksfólkinu okkar í íþróttum sem ferðast þarf fram og til baka í keppnir,“ segir Líney Rut Halldórsdóttir, framkvæmdastjóri Íþrótta- og ólympíusambands Íslands, við Vísi.

Kórónuveirufaraldurinn hefur sett allt íþróttalíf úr skorðum síðustu 10 mánuði eða svo og olli meðal annars því að Ólympíuleikunum í Tókýó var frestað um ár. Þeir hefjast 23. júlí. ÍSÍ skilgreindi í haust 27 manna hóp íþróttafólks sem freistar þess að komast á leikana en sundmaðurinn Anton Sveinn McKee er sá eini sem hefur tryggt sér farseðilinn.

Í flestum greinum Ólympíuleikanna er mikilvægt fyrir keppendur að komast á alþjóðleg mót og safna stigum til að styrkja stöðu sína á heimslista, til að komast inn á leikana.

„Það er talsvert síðan að við byrjuðum að impra á því varðandi þessar bólusetningar. Það er auðvitað ákveðin reglugerð í gangi en við erum búin að ræða þetta við sóttvarnalækni og heilbrigðisyfirvöld, að þetta sé eitthvað sem við viljum koma að,“ segir Líney.

Þyrfti að bólusetja alla sem reyna að ná lágmörkum fyrir ÓL

Í reglugerð heilbrigðisráðuneytisins um forgangsröðun í bólusetningu er hvergi minnst á íþróttafólk. Heilbrigðisstarfsfólk er á forgangslista, ásamt eldra fólki og einstaklingum með langvinna sjúkdóma, og neðarlega á forgangslista er einnig starfsfólk í skólum og fleiri.

„Við verðum nú ekki í forgangi fyrir framan heilbrigðisstéttir og mjög viðkvæma hópa en við erum klárlega að reyna að koma þessu á framfæri því þetta er mjög mikilvægt. Ég veit að alþjóða ólympíunefndin er líka með þá áskorun að búið verði að bólusetja alla ólympíufara í tíma. Við munum halda þessu á lofti líka,“ segir Líney. Hún segir málið hafa verið rætt í lok árs.

„Við þurfum að setja þetta aftur á dagskrá með formlegum hætti núna, þegar bóluefnið er byrjað að berast.

Þetta hangir auðvitað allt á því hve mikið magn við fáum af bóluefni. Við höfum skilgreint tæplega 30 manna hóp íþróttafólks sem reynir að komast inn á Ólympíuleikana. Það er bara einn búinn að ná ólympíulágmarki, Anton Sveinn, en það þyrfti í raun að bólusetja alla sem eru að reyna að ná lágmörkum á komandi mánuðum,“ segir Líney.

Handboltalandsliðið bólusett við ýmsu en ekki COVID

Hún segir að viðræður við heilbrigðisyfirvöld um bólusetningu íþróttafólks snúist þó ekki eingöngu um hinn 27 manna hóp sem stefnir á Ólympíuleikana. Fleira afreksfólk í íþróttum bíði og vonist eftir því að geta ferðast óhindrað.

Aðspurð hvort sóst hafi verið eftir bólusetningu fyrir karlalandsliðið í handbolta fyrir förina til Egyptalands, segir Líney það hafa verið aðeins rætt en ákveðið að ekki yrði af því. Landsliðið fór reyndar í alls konar bólusetningar fyrir ferðalagið til Afríku, en ekki við COVID-19, og er nú mætt til Egyptalands.