Óttast að skákmót séu smitpyttur

Fjörug umræða er á þræði í Facebookhópi sem ber hið gegnsæja nafn Íslenskir skákmenn, þá um hvort fresti þurfi Íslandsmóti skákfélaga (Deildó), sem er fjölmennasti skákviðburður ársins og sjálfu Reykjavíkurskákmótinu í Hörpu vegna kórónuveirunnar. Aðeins eru tvær vikur í Íslandsmótið en Reykjavíkurmótið er um miðjan apríl.

Einn keppandi, Davíð Kjartansson, gengur fram af mikilli einurð og hefur lýst því yfir að hann ætli í það minnsta að halda sig heima við vegna smithættu.

Káfa á sömu taflmönnunum

Skákmenn sjá fyrir sér að það standi ekki margt í vegi ef veiran nær að stinga niður fæti í Hörpu meðan menn sitja yfir svörtu og hvítu reitunum og káfa á taflmönnum hvors annars vinstri hægri. Sverrir Björn Björnsson bendir á að veiran dreifi sér fyrst og fremst með snertingu þannig að lykilatriði er að draga úr líkum á snertismiti.

„Verði mótið haldið á því að banna skákmönnum að takast í hendur yfir borðinu. Einnig þarf að koma í veg fyrir að menn séu mikið að káfa á sömu taflmönnunum. Það verður gert með því að leyfa bara simmetrískan enskan leik og lokaða afbrigðið í sikileyjarvörn í deildó og mælast til þess að menn forðist uppskipti í lengstu lög. Það mætti hugsa sér að setja hámark uppskipta pr. skák.“

Að ýmsu er að hyggja og ef skákmeistarar geta ekki séð fyrir næsta leik, hver getur það þá?

„Hugsum okkur eina sviðsmynd,“ segir Jón Þorvaldsson sem lætur mjög til sín taka í hinni áhugaverðu umræðu. „Fjölsetið Íslandsmót skákfélaga á Selfossi. Skyndilega fær einn keppandinn ákafan, háværan hósta af einhverjum orsökum. Hvaða áhrif hefur þetta á líðan og einbeitingu annarra keppenda? Hvað með hóstandann sjálfan?“

Jón er framkvæmdastjóri Eflis og sérfræðingur í almannatengslum. Hann er þekktur vígorðasmiður og bjó m.a. til hið gullna slagorð Happdrættis Háskóla Íslands: „Vænlegast til vinnings.

Skákmót algjör smitpyttur

 Jóni finnst að skákmót séu ekki, fremur en önnur mannamót, öruggur staður til að vera á og ýmsir taka í sama streng.

Mönnum þykir bölvað að slá skákmótin af, þar velta menn því meðal annars fyrir sér hvort Skáksamband Íslands greiði fyrirliggjandi kostnað sem menn hafa lagt út í vegna skákmótsins nú þegar? En, Jón bendir á að það sé vel hugsanlegt að Skáksambandið sé einmitt skaðabótaskylt komi upp fjöldasmit á mótunum.

Ekki eru það síst hinir erlendur gestir sem væntanlegir eru sem þátttakendur í umræðunni hafa áhyggjur af. 

„Ég hef minni áhyggjur af Íslandsmóti Skákfélaga en Reykjavík Open. Þar eru töluvert fleiri erlendir keppendur og Harpan fjölmennur staður fyrir ferðamenn að heimsækja,“ segir Davíð og Una Strand Viðarsdóttir telur að Íslandsmót skákfélaga án erlendra þátttakenda gæti bara verið „svoldið skemmtileg tilbreyting“.

Sindri Guðjónsson heldur reyndar að deildarkeppnin sé … 

„algjör smitpyttur því þar eru allir að hræra fram og til baka í sömu taflmönnunum, og þess á milli með hendurnar í andlitinu o.s.frv.“

Kórónuvera smitast ógnarhratt

Sem áður sagði telur Jón Þorvaldsson fulla ástæðu til að öllu með gát. Og vitnar í virtan verkfræðing sem er meðal annars sérfræðingur á sviði áhættumats:

„Kórónuveiran smitar óvenjuhratt. Hver einstaklingur með veiruna smitar að jafnaði 2,6 til 3 einstaklinga. Flensuveiran er ekki eins smitandi, hér er talan 1,5 Það tekur ekki langan tíma að stór hluti þjóðarinnar verði smitaður af völdum kórónuveirunnar.

Gefum okkur að 10 þús manns verði veik á sama tíma. Þá verða 2 þús alvarlega veikir og 5 prósent eða 500 manns þurfa mikla aðstoð gjörgæslu / öndunarvél. Heilbrigðiskerfið hér ræður aldrei við það.

Er ekki skynsamlegt t.d sem byrjun a.m.k. að mæla með því að menn takmarki fjöldasamkomur? Auðvitað eigum við að vera með strangari aðgerðir en er ekki rétt að byrja einhversstaðar og sjá hvort við getum spyrnt á móti?...“

Blindskák er svarið

Áskell Örn Kárason vill hins vegar slá á létta strengi og segir: „Blindskák er svarið við COV 19.“

Jón Viktor Gunnarsson skákmaður er heldur ekki til í að gleypa hina alvörugefnu umræðu hráa og segir: 

„Nauðsynlegt að vera í hönskum líka ef menn taka eitruð peð.“

Og Björn Þorfinnsson blaða- og skákmaður birtir af sér mynd í einangrunargalla og segist í það minnsta tilbúinn í slaginn.

Nú nýverið spurðist að Dubai Open hafi verið frestað vegna kórónuveirunnar, sem til stóð að halda í apríl, á svipuðum tíma og Reykjavíkurskákmótið. Þannig að flest bendir til þess að það og Íslandsmót skákfélaga séu í uppnámi.