Lægð í örum vexti

Í dag er útlit fyrir norðan- og norðvestanátt á landinu, fimm til þrettán metra á sekúndu en þrettán til átján í vindstrengjum á Suðausturlandi og Austfjörðum.

Þá er spáð rigningu norðan- og austanlands en léttir smám saman til á sunnan- og vestanverðu landi, að því er segir í hugleiðingum veðurfræðings á vef Veðurstofu Íslands.

Í nótt verður svo kominn hæðarhryggur yfir landið með rólegheitaveðri í öllum landshlutum. Því er tilvalið að nýta morgundaginn til útiveru því á sunnudag gengur hann í hvassa suðaustanátt þegar lægð sem nú er í örum vexti við Nýfundnaland nálgast landið með hitaskilum.

Í næstu viku er síðan útlit fyrir lægðagang suður af og yfir landið með suðlægum áttum, rigningu og mildu veðri.

Veðurhorfur á landinu:

Norðan- og norðvestanátt, 5-13 m/s en 13-18 í vindstrengjum á Suðausturlandi og Austfjörðum. Rigning norðan- og austanlands, en slydda eða snjókoma til fjalla. Skýjað með köflum sunnan og vestanlands en eftir hádegi.

Lægir seint í dag og í kvöld og dregu úr úrkomu á norðaustanverðu landinu. Hæg breytileg átt á morgun og allvíða léttskýjað en snýst í vaxandi suðaustanátt og þykknar upp með rigningu suðvestantil seint annað kvöld. Hiti 2 til 10 stig í dag, hlýjast á Suðausturlandi en kólnar á morgun.

Á laugardag:

Hæg breytileg átt og víða léttskýjað. Hiti 2 til 7 stig yfir daginn. Vaxandi suðaustanátt, þykknar upp og fer að rigna á Suður- og Vesturlandi um kvöldið.

Á sunnudag:

Suðaustan 10-18 m/s og talsverð rigning sunnan- og vestanlands en snýst í suðvestan 8-13 með skúrum síðdegis. Hægari vindur og þurrt um landið norðaustanvert, en fer einnig að rigna þar seinnipartinn. Hiti 4 til 9 stig.

Á mánudag:

Breytileg átt 3-10 og dálítil væta í flestum landshlutum, en styttir upp síðdegis. Hiti 4 til 9 stig.

Á þriðjudag:

Hægt vaxandi sunnanátt. Skýjað og þurrt að kalla, en léttskýjað á Norður- og Austurlandi. Hiti 5 til 10 stig.

Á miðvikudag:

Ákveðin sunnanátt með súld eða rigningu, en þurrt norðaustan- og austanlands. Hiti 6 til 12 stig, hlýjast á Austurlandi.