Landamærin lokuð, en veiran blossar upp að nýju; hver er nú syndaselurinn, Kári?

M.a. vegna hræðsluáróðurs skimunarpáfans var landamærum Íslands lokað 19. ágúst. Fyrir mánuði.

Þetta átti að bjarga öllu gagnvart veirunni. Vera pottþétt lausn. Það var um að gera, að halda hættulegum útlendingum frá, þrátt fyrir stórskaðlegar afleiðingar á atvinnu- og mannlíf í landinu.

Skítt með það. Það er gott, ef hægt er að skima sem mest. Fyrir vísindin. Meira að segja, þó að 2. alda veirunnar valdi varla sjúkdómseinkennum, hvað þá alvarlegum veikindum. Þetta er eins og létt pest hjá flestum, sem menn verða vart varir við.

Skimunarmeistarinn mikli getur auðvitað kallað veiruna margvíslegum nöfnum, líka nefnt hana græna, búið til ýms vísindaleg orð og útskýringar og talað um alls kyns stökkbreytingar, svona til að sýna vísdóm sinn og speki, en það breytir ekki því, að öll afbrigði vírussins, nú í 2. bylgju, gera varla flugu mein.

Undirritaður er nú í Þýzkalandi, sem hefur þurft að komast af án spámannsins mikla, sem Ísland á - kannske er það lán Þjóðverja - en hérna er staðan þessi:

-Allir ganga með grímur, þegar þeir eru innan um aðra,

einkum í lokuðum rýmum

-Samkomutakmarkanir virðast víðast hvar 500 manns

-Fjarlægðar milli manna og hreinlætis er vel gætt af flestum

-Þegar menn eru undir beru loftir eða sestir við borð á

veitingastað, taka menn grímu ofan

-Þegnar 25 þjóða mega koma til landsins frjálslega, hindrunarlaust og án skimana á landamærum

-Í 1. bylgju, í marz-maí, létust, þegar mest var, nær 300 manns á dag, nú í 2. bylgju, er dagleg dánartala 0-10 (af 83 milljón manna þjóð)

-Landsframleiðsla, sem fyrst var talið, að myndi dragast saman um allt að 9%, hefur nú verið leiðrétt í 5-6% samdrátt; atvinnlífið er að taka við sér af fullum krafti

-Fjölgun smita hér er, þessa dagana, hlutfallslega vel undir helmingi af því, sem gerizt á Íslandi.

Varðandi ferðafrelsi, er afstaða Þjóðverja þessi: Skv. ESB- og EES samningunum, ber þeim að virða fjórfrelsið, þ.á.m. ferðafrelsið, einkum gagnvart þeim, sem eru með þeim í Schengen-samkomulaginu, eftir fremsta megni, af yfirvegun og samkvæmt meðalhófsreglunni.

Þegar afstaða er tekin til þess, hverjir hafa megi frjálsan og óhindraðan aðgang að landinu, er miðað við, að þær þjóðir, sem hafa jafn góð eða betri tök á útbreiðslu veirunnar, og þeir sjálfir, megi koma hindrunarlaust og án skimana.

Er hér bæði miðað við skynsemi, skuldbindingar skv. samningum og velvild til vinaþjóða; sama eða betri blanda smitaðra og ósmitaðra komumanna á ekki að breyta þessu hlufalli meðal heimamanna.

Þegnar þessara þjóða mega koma frjálslega og skimunarlaust til Þýzkalands í stöðunni: Danmörk, Eistland, Finnland, Grikkland, Írland, Ísland, Ítalía, Kýpur, Lettland, Lichtenstein, Litháen, Lúxemborg, Malta, Monakó, Noregur, Póland, Portúgal, San Marinó, Svíþjóð, Slóvakía, Slóvenía, Vatíkanið, auk Englands, Skotlands og Norður Írlands.

Ef við myndum innleiða sömu stefnu gagnvart öðrum þjóðum, myndi það eflaust endurræsa flestar þær aflvélar þjóðfélagsins, sem nú hefur verið drepið á, ekki bara ferðaþjónustuna og flest, sem henni tengist, heldur allt þjóðfélagið, okkur öllum til góðs.

Jafnvel þrengri hringur, eins og ferðafrelsi fyrir hin Norðurlöndin 4 og Þýzkaland, myndi sennilega endurlífga ferðaþjónustuna að nokkru leyti og halda henni gangandi á hálfum dampi, þar til betur árar.

Það er kominn tími til, að mönnum, sem stjórnast af þröngsýni og öfgum, kannske líka stórfelldum eiginhagsmunum, sé ýtt til hliðar við stjórnun COVID-19 mála á Íslandi. Og, þó fyrr hefði verið.

Menn verða að líta til heildarmyndarinnar, ekki bara hluta hennar, ef beztur mögulegur heildarárangur á að nást við stjórnun þessara COVID-19 mála!