Páll um bæturnar: „Svo himinhrópandi að þetta tekur eiginlega engu tali“

Páll Magnússon, formaður allsherjar- og menntamálanefndar, segist skilja reiði fólks varðandi samanburð á bótagreiðslu ríkisins vegna brots á jafnréttislögum annars vegar og dauða ungabarns vegna mistaka hins vegar. Þetta væri ofar hans skilningi.

Þetta sagði Páll í Reykjavík Síðdegis á Bylgjunni í dag og var hann að tala um tvö mál. Annars vegar það að hjónin Sigríður Eyrún Friðriksdóttir og Karl Olgeirsson fengu fimm milljónir króna í bætur frá ríkinu vegna alvarlegra mistaka sem gerð voru á fæðingardeild Landspítalans sem leiddu til þess að nýfæddur sonur þeirra lést. Hins vegar var Páll að tala um það að Ólína Þorvarðardóttir fékk tuttugu milljónir í bætur vegna brots Þingvallanefnd á jafnréttislögum varðandi ráðningu í stöðu þjóðgarðsvarðar.

Málin tvö og upphæðir bótanna hafa verið borin saman á samfélagsmiðlum og víðar á undanförnum dögum.

Páll sagði upphæð bóta sem Ólína fékk vera hneyksli og tilefni til að endurskoða lögin sem bæturnar byggja á.

„Því við megum ekki gleyma því að það var ekki verið að bæta Ólínu skaða sem hún hlaut fyrir það að óhæfari eða minna hæfur maður hafi verið ráðinn. Það sem liggur til grundvallar þarna er að, eins og ég lít á málið, að þá hafi sú ráðningarskrifstofa sem hélt utan um formlega partinn af þessu ferli, hún hafi ekki haldið til haga, ekki skráð með neinum hætti, það huglæga mat sem hafði legið að baki þessarar ráðningu, með sama hætti og hlutlæga matið,“ sagði Páll.

Hann sagði vert að hafa í huga að sá sem var ráðinn skoraði hærra varðandi bæði þessa hluti.

„En skráningin var sem sagt ekki í lagi, á huglæga hlutanum, og að mistök af því tagi skuli leiða til bótaskyldu af hálfu ríkisins upp á tuttugu milljónir króna er eiginlega fyrir utan og ofan allt velsæmi að mínu mati.“

Hann sagði málið enn fáránlegra í samhengi við hinar bæturnar.

„Ég brest bara við með sama hætti og auðvitað almenningur gerir. Þetta ósamræmi á milli þessara tveggja hluta, þetta er svo himinhrópandi að þetta tekur eiginlega engu tali.“

Aðspurður hvort hann skildi reiði fólks, sagðist Páll skilja hana mætavel. Annað væri ekki hægt.

„Ef við horfum á tilefnin tvö og síðan bæturnar í hvoru tilviki fyrir sig, þá er þetta auðvitað fyrir utan og ofan skilning venjulegs fólks. Þar með talið fyrir utan og ofan minn skilning,“ sagði Páll.

Hlusta má á þennan hluta Reykjavík síðdegis hér að neðan.