Sænskur leikstjórnandi til FH

FH hefur gert samning við sænsku handknattleikskonuna Zandra Jarvin um að spila með liðinu næstu tvö árin.

Jarvin er tvítug og spilar sem leikstjórnandi en hún hefur leikið með sænska liðinu Spårvägen undanfarin ár, sem og með yngri landsliðum Svíþjóðar.

„Við FH-ingar erum svakalega spenntir fyrir þessum leikmanni,“ sagði Ásgeir Jónsson formaður handknattleiksdeildar FH í fréttatilkynningu.

„Við höfum séð fjölmarga leiki með henni og fær hún einnig mjög góð meðmæli frá þjálfurum í Svíþjóð. Hún mun án efa styrkja okkur verulega,“ sagði Ásgeir.

FH vann sig upp úr Grill 66 deildinni á síðustu leiktíð og leikur því í Olís-deildinni í vetur.

„Við ætlum okkur góða hluti í Olís-deildinni næsta vetur og munum áfram byggja á þeim ungu og öflugu stelpum sem hafa fengið sviðið í Grill 66 deildinni undanfarin ár en eru núna tilbúnar á stóra sviðið. Það eru spennandi tímar framundan hjá meistaraflokki kvenna en markmiðið er að styrkja liðið enn frekar fyrir átökin í haust,“ sagði Ásgeir.