Hrönn næsti forstjóri MAST

Hrönn Jörundsdóttir hefur verið ráðin næsti forstjóri Matvælastofnunar. Hún hefur störf um mánaðamótin og gegnir embættinu til næstu fimm ára. Alls bárust átján umsóknir um starf forstjóra Matvælastofnunar en Jón Gíslason, forstjóri Matvælastofnunar til 15 ára, var ekki meðal umsækjenda.

Í orðsendingu stjórnarráðsins segir að hæfnisnefnd hafi talið fimm umsækjendur vel hæfa til að gegna forstjórastöðunni. Kristján Þór Júlíusson, sjávarútvegs- og landbúnaðarráðherra, boðaði þessa fimm á sinn fund og að endingu var það hans mat að Hrönn væri hæfust.

Hún er með BS gráðu í efnafræði frá Háskóla Íslands og lauk MS-prófi í umhverfisefnafræði árið 2002 frá Stokkhólmsháskóla. Árið 2009 lauk hún einnig doktorsgráðu í umhverfisefnafræði frá Stokkhólmsháskóla og hefur unnið hjá MATÍS undanfarin 11 ár.

Hrönn hefur verið stjórnandi hjá MATÍS frá árinu 2016 þar sem hún hefur stýrt fjölmörgum innlendum og alþjóðlegum rannsóknarverkefnum, stefnumótun, rekstri og ráðgjafarverkefnum. Einnig hefur Hrönn verið formaður áhættumatsnefndar á sviði matvæla, fóðurs, áburðar og sáðvöru frá árinu 2019. Hún hefur ennfremur sérhæft sig á sviði matvælaöryggis, áhættumats og áhættumiðlunar.