Valur staðfestir brotthvarf Daníels Freys

Í janúar var greint frá því að markvörðurinn Daníel Freyr Andrésson væri á leið til sænska félagsins Eskilstuna Guif. Nú hefur handknattleiksdeild Vals staðfest skiptin og mun Daníel Freyr því ekki verja mark liðsins á næstu leiktíð.

„Danni hefur verið einn besti markmaður deildarinnar eftir að hann gekk í raðir félagsins og myndaði í vetur öflugt par með Hreiðari sem skilaði liðinu deildarmeistaratitli og 8-liða úrslitum í Evrópukeppni,“ segir í tilkynningu á Facebook-síðu Vals.

Er þetta ekki í fyrsta sinn sem Daníel heldur erlendis en hann lék sem atvinnumaður í fjögur ár í Danmörku og Svíþjóð áður en hann gekk í raðir Vals.