Efling og Reykjavík fresta fundi

Saminganefndir Reykjavíkurborgar og Eflingar hafa ákveðið að fresta formlegum samningafundi sem hófst klukkan tvö í gær. Ástráður Haraldsson, sáttasemjari hjá Ríkissáttasemjara, staðfesti þetta fyrir skömmu þegar hann yfirgaf Karphúsið skömmu fyrir þrjú í nótt.

Nýr fundur hefst klukkan tvö í dag.

Sólveig Anna Jónsdóttir, formaður Eflingar, vildi ekki tjá sig við fjölmiðla þegar hún yfirgaf Karphúsið í nótt. Hún sagði eingöngu að fundir dagsins hafi verið áhugaverðir.

Hátt í tvö þúsund félagsmenn Eflingar sem starfa hjá Reykjavíkurborg hafa nú verið í ótímabundnu verkfalli frá og með 17. febrúar. Skóla- og leikskólastarf hefur raskast töluvert í Reykjavík á meðan á verkfallinu hefur staðið.

Í dag hefst verkfall Eflingar í öðrum sveitarfélögum en Reykjavík. Verkfallið hefði mikil áhrif á starf víða í grunnskólum og þá sérstaklega í Kópavogi.