Myndir sýna muninn á Kringlunni í miðju samkomubanni og eftir 4. maí

Samkomubann vegna kórónuveirufaraldursins tók gildi á Íslandi 16. mars síðastliðinn og var svo hert 24. mars. Og Íslendingar héldu sig svo sannarlega heima, í það minnsta fyrst um sinn. Þetta sýna til dæmis myndir sem Vilhelm Gunnarsson ljósmyndari Vísis tók í vettvangsferð um Kringluna fyrstu daga samkomubanns og aftur í lok mars þegar það stóð sem hæst. Nær enginn sást á ferli og víða voru verslanir, veitingastaðir og önnur þjónusta lokuð.

Fyrstu tilslakanir á kórónuveiruaðgerðum stjórnvalda tóku svo gildi mánudaginn 4. maí. Þar með voru fjöldamörk samkomubanns hækkuð úr 20 í 50 og ýmis starfsemi gat opnað dyr sínar á ný. 

Og þessar tilslakanir virðast hafa skilað sér í ásókn í Kringluna. Þegar Vilhelm gerði sér aftur ferð þangað í dag var töluvert líflegra um að lítast en í mars. Það rímar ágætlega við kaupæðið sem nú virðist grípa Íslendinga en verslunarmenn hafa margir aldrei selt jafnmikið af hinum ýmsu vörum og einmitt núna.

Myndir frá Kringluheimsóknum Vilhelms, þar sem Kringlan sést í miðju samkomubanni og svo eftir tilslakanir, má finna hér að neðan.