Mann­björg þegar bátur sökk í Breiða­firði

Stjórnstöð Landhelgisgæslunnar barst neyðarkall frá togbátbát sem staddur var norður af Stykkishólmi á tólfta tímanum í dag. Þrír voru um borð.

Í tilkynningu frá Landhelgisgæslunni segir að þyrla hafi þegar í stað verið kölluð út sem og sjóbjörgunarsveitir á vegum Slysavarnafélagsins Landsbjargar. 

„Þá voru skip og bátar í grenndinni beðnir um að halda á vettvang. Klukkan 12:08 var búið að bjarga mönnunum, sem komnir voru í björgunarbát, af nálægu fiskiskipi sem kom á staðinn. Bátur mannanna er sokkinn.

Þyrla Landhelgisgæslunnar var þá afturkölluð. Báturinn datt úr tilkynningarskyldu hjá stjórnstöð Landhelgisgæslunnar og skömmu síðar barst neyðarskeyti frá honum. Þá sást neyðarblys á lofti.

Samvinna björgunaraðila og skipa á svæðinu var til algjörrar fyrirmyndar en búið var að bjarga mönnunum um borð í fiskiskipið rúmum hálftíma eftir að neyðarkallið barst,“ segir í tilkynningunni.