Jóhann Berg fór meiddur af velli

Jóhann Berg Guðmundsson þurfti að fara meiddur af velli eftir aðeins þrettán mínútna leik í leik Íslands og Frakklands sem nú stendur yfir á Laugardalsvelli.

Jóhann Berg virtist togna aftan í lári þegar hann féll í jörðina á 13. mínútu leiks Íslands og Frakklands í undankeppni EM 2020.

Mjög fljótlega var ljóst að hann myndi ekki geta haldið áfram leik og kom Jón Daði Böðvarsson inn í hans stað.

Jóhann Berg hefur átt við meiðsli að stríða síðustu misseri og missti meðal annars af síðasta landsleikjaglugga.

Ólíklegt verður að teljast að Jóhann Berg muni ná að spila leikinn við Andorra á Laugardalsvelli á mánudag.

Þegar þetta er skrifað er staðan í leik Íslands og Frakklands markalaus en það má nálgast beina textalýsingu af leiknum hér.