Tveir fluttir með sjúkraflugi frá Vestmannaeyjum eftir líkamsárásir

Tveir voru fluttir með sjúkraflugi frá Vestmannaeyjum eftir alvarlegar líkamsárásir í nótt. Alls eru fjórar líkamsárásir til rannsóknar hjá lögreglunni eftir nóttina, þar af tvær alvarlegar. Þrír eru í haldi vegna rannsóknar málanna.

Alls komu upp tíu fíkniefnamál í Eyjum í nótt, þar af eitt þar sem grunur er um sölu á fíkniefnum. Níu af þeim teljast svokölluð neyslumál.

Samkvæmt Facebook-síðu lögreglunnar í Vestmannaeyjum var kvöldið rólegt en erillinn hófst undir morgun. 

Á föstudagskvöld komu einnig upp tíu fíkniefnamál og sex gistu í fangaklefa eftir föstudagsnóttina.