Vestur­lands­vegi lokað vegna mal­bikunar­fram­kvæmda

Síðdegis í dag og fram til morguns er stefnt að því að fræsa og malbika akrein og hringtorg á Vesturlandsvegi við Álafossveg.

Verður Vesturlandsvegi lokað meðan á framkvæmdunum stendur en hjáleiðir verða settar upp með viðeigandi merkingum að því er segir í færslu á Facebook-síðu lögreglunnar á höfuðborgarsvæðinu.

Áætlað er að framkvæmdirnar standi frá klukkan 17 og til klukkan sex aðfaranótt þriðjudagsins 9. júlí, það er þar til í fyrramálið.

Einnig er stefnt að því í kvöld að fræsa tvær akreinar á Hringbraut, frá Njarðargötu og yfir gatnamót við Flugvallaveg.

Annarri akreininni verður lokað og viðeigandi merkingar og hjáleiðir verða settar upp. Áætlað er að framkvæmdirnar standi frá kl. 20:00 til kl. 04:00 aðfaranótt þriðjudags 9. júlí.

Vegfarendur eru beðnir um að virða merkingar og hraðatakmarkanir og sýna aðgát við vinnusvæðin sem eru þröng og menn og tæki við vinnu mjög nálægt akstursbrautum.