Lyngrósin Vigdís afhent að Vigdísi viðstaddri

Lyngrósin Vigdís er komin til landsins fyrir milligöngu Garðyrkjufélags Íslands og verður afhent Grasagarði Reykjavíkur formlega klukkan 14 að Vigdísi Finnbogadóttur, fyrrverandi forseta Íslands, viðstaddri. Þetta kemur fram í tilkynningu frá Reykjavíkurborg.

Þar segir að Lyngrósin Vigdís (Rhododendron decorum ´Vigdís´) eigi sér afar merka sögu. Vilhjálmur Lúðvíksson, fyrrverandi formaður Garðyrkjufélags Íslands, hafi rekist á lyngrósina af algerri tilviljun á athafnasvæði lyngrósagarðsins í Bremen í Þýskalandi árið 2018. Á miða sem festur var við plöntuna hafi staðið nafnið „Vigdís“.

„Við nánari athugun kom í ljós að lyngrósin kemur frá lyngrósagarðinum á Milde í Noregi og var ræktuð upp af fyrrverandi forstöðumanni garðsins, Per M. Jörgensen prófessor, sem staðfesti að lyngrósin héti í höfuðið á Vigdísi Finnbogadóttur, fyrrverandi forseta Íslands. Jörgensen hafði ætlað að færa Vigdísi blómvönd af lyngrósinni í opinberri heimsókn hennar til Bergen árið 1992 og tilkynna henni þá yrkisnafn plöntunnar. Vegna breytinga á áætlun forsetans varð ekki af þessum fundi og hafði hún því ekki heyrt af lyngrósinni sem heitir eftir henni fyrr en Vilhjálmur rakst á plöntuna í Bremen 26 árum síðar,“ segir í tilkynningu frá borginni.

Nú sé lyngrósin Vigdís komin til landsins fyrir milligöngu Garðyrkjufélags Íslands og Rósaklúbbs og Sígræna klúbbs þess og verður afhent Grasagarði Reykjavíkur formlega klukkan 14 í dag við aðalinngang garðsins.

Fréttin var uppfærð með nýrri aðalmynd klukkan 14:30.