„Menn eru ekki einu sinni sammála um hvað var rætt um“

Bjarni Benediktsson, fjármálaráðherra, segir gagnrýni á skattatillögur ríkisstjórnarinnar vera illskiljanlega og er gáttaður á því að kjaraviðræður hafi tekið eins langan tíma og raunin er en á sama tíma hafi viðræður ekkert gengið og svo virðist sem að deiluaðilar viti ekki hvað verið sé að ræða.

Þetta kom fram í máli Bjarna í morgun þar sem hann var gestur Kristjáns Kristjánssonar í Sprengisandi á Bylgjunni í morgun.

Bjarni byrjaði á því að ræða skattabreytingartillögur ríkisstjórnarinnar og sagði undarlegt að hlusta á umræðu um þær tillögur. Það hefði ávallt staðið til og væri í stjórnarsáttmála að lækka ætti neðra skattþrepið um sem nemi einu prósentustigi. Tillagan hefði verið í samræmi við allar yfirlýsingar og því hafi komið á óvart að fólk hafi sagt hana ekki í samræmi við væntingar.

„Ég held það sé eitthvað allt allt annað sem býr hér að baki,“ sagði Bjarni. Inntur eftir því hvað það væri sagði hann: „Bara það að það eru allt önnur vandamál en menn eru að glíma við en þessi skattaútfærsla ríkisstjórnarinnar, sem er skattalækkun. Súrefni inn í stöðuna. Eitt væri nú ef að við hefðum verið að hækka skatta og gera mönnum erfitt fyrir sem eru að reyna að bæta kjör sín. En við erum að reyna að lækka skatta og það er ótrúlegt að hlusta hér á fólk sem sat hér áðan hjá þér að tala um að það sé engin þörf til að bæta kjör þeirra sem eru að vinna hér á vinnumarkaði, berjast í bökkum, á meðallaunum. Það sé bara fráleitt að slíkt fólk sé að fá einhverja skattalækkun.“

Þar var Bjarni að vísa til fyrri gesta Kristjáns. Þeirra Þorsteins Víglundssonar, Oddnýjar Harðardóttur, Friðjóns Friðjónssonar og Drífu Snædal sem höfðu verið gestir Kristjáns á undan Bjarna.



Sjá einnig: Sakar verkalýðshreyfinguna um leikaraskap

Kristján spurði þó hver hefði sagt þetta og Bjarni svaraði á þá leið að þetta hefði margsinnis komið fram.

„Að það sé ósanngjarnt að þessar 80 þúsund krónur, gangi upp í hátekjuþrepið. Vegna þess að enginn sé að kalla eftir þessu, þetta sé algjör óþarfi og það sé fáránlegt að fólk fái 80 þúsund krónur. Hvort sem það er á 300 þúsund krónum eða 700 þúsund krónum á mánuði.“

Hann sagði alltaf gott mál að geta lækkað skatta á því launabili. Þar væri fólk sem væri líka í kjarabaráttu.

Óþægileg tilfinning að átök hafi verið markmiðið

Bjarni og Kristján fóru víða um en Bjarni sagðist einnig spyrja sig hvaða skýringar væru á því að ekki hefði verið lengra komist í viðræðum.

„Vandamálið er að þeir sem eiga að semja eru, eftir margra mánaða viðræður, ekki einu sinni sammála um það sem þeir voru að tala um. Það er vandamálið. Maður hefur þessa óþægilegu tilfinningu að það sé sjálfstætt markmið að fara í átök. Hvaða aðrar ályktanir á maður að draga þegar niðurstaðan eftir margra mánaða viðræður er nánast engin. Menn eru ekki einu sinni sammála um hvað var rætt um. Það er ótrúlega döpur staða. Maður spyr sig hvaða skýringar eru á því að menn komast ekki lengra.

Þetta góða fólk sem virðist ætla að berjast fyrir hagsmunum sinna félagsmanna og atvinnurekendur fyrir sitt leyti. Eftir að hafa setið með þeim á annan tug funda þá hefði maður trúað því allan tímann að það væri verið að vinna markvisst við samningaborðið, en mér finnst það ekki markviss vinna þegar menn standa upp og tala bara út og suður um það sem gerðist við samningaborðið,“ sagði Bjarni Benediktsson, fjármálaráðherra, í þættinum Sprengisandi í morgun.

Hlusta má á hluta þáttarins sem um ræðir hér að neðan.