Gagn­rýna vinnu­brögð þingsins við bóka­styrk vegna full­veldis­af­mælis

Átta bókaútgefendur, þau Sigurður Svavarsson, Heiðar Ingi Svannson, Birgitta Elín Hassel, Egill Örn Jóhannsson, Pétur Már Ólafsson, Dögg Hjaltalín, Anna Lea Friðriksdóttir og María Rán Guðjónsdóttir, gagnrýna styrkveitingu Alþingi til Hins íslenska bókmenntafélags vegna útgáfu tveggja verka í tilefni af 100 ára afmæli fullveldisins.

Útgefendurnir rita aðsenda grein í Morgunblaðið í dag þar sem þeir gagnrýna vinnubrögð þingsins við styrkveitinguna og segja þau heyra fortíðinni til.

Styrkirnir til Hins íslenska bókmenntafélags eru vegna útgáfu á verki um Þingvelli í íslenskri myndlist og hins vegar vegna útgáfu á nýju yfirlitsverki um íslenska bókmenntasögu.

Þingmenn allra flokka standa að tillögu vegna útgáfunnar

Lögð hefur fram þingsályktunartillaga vegna málsins sem rædd verður, og að öllum líkindum samþykkt, á hátíðarfundi á Þingvöllum á morgun sem haldinn er vegna 100 ára fullveldisafmælisins. Þingmenn allra flokka eru flutningsmenn að tillögunni en styrkur vegna útgáfu verkanna hljóðar upp á allt að 30 milljónir króna.

Útgefendurnir segja í grein sinni í dag að ekkert mat liggi að baki styrkveitingunni:

„Að baki þessari styrkveitingu hvílir ekkert mat og ekki hafði verið óskað eftir hugmyndum annarra forlaga um útgáfu slíkra verka, enda þótt ýmsir hafi reynslu af útgáfu bóka um Þingvelli og ekki sé nema liðlega áratugur síðan lokið var við það þrekvirki að gefa út Íslenska bókmenntasögu í fimm bindum, með ærnum tilkostnaði.“

Þá segja útgefendurnir að þeir hafi ekkert á móti því að Alþingi hvetji til metnaðarfullra útgáfuverkefna en segja að tryggja verði ákveðið jafnræði varðandi aðkomu bókaútgefenda og leggja faglegt mat á tillögur sem berast. Það sé meira að segja til „opinbert apparat“ sem sjái um styrkveitingar á borð við þessar, Miðstöð íslenskra bókmennta.

Geðþótti stjórnmálamanna ráði ekki för

„Sumum kann að finnast óþarft að stökkva upp á nef sér vegna ekki meiri fjármuna, en þá er rétt að geta þess að upphæðin er nánast sú sama og allir útgáfustyrkir Miðstöðvar íslenskra bókmennta á síðasta ári, nema hvað hún sáldraðist þá yfir á sjötta tug verka. Í því samhengi er um mikla fjárhæð að ræða.

Við efumst ekki um að útgáfufyrirtækið sem nýtur þessarar óvæntu rausnar Alþingis muni nýta fjármunina til góðra verka. Vinnubrögðin við þessa styrkveitingu eiga hins vegar að heyra fortíðinni tryggilega til og okkur finnst með ólíkindum að þingheimur skuli hafa samþykkt þetta einum rómi, enda eiga menn á þeim bæ að vita betur.

Það er leitt að þurfa að spilla veisluhöldum þingsins með aðfinnslum, en vinur er sá er til vamms segir. Geðþótti stjórnmálamanna á ekki að ráða því hvaða verk koma út hér á landi, né hvaða fyrirtækjum skuli hyglað á sviði bókaútgáfu, frekar en í öðrum geirum menningar- og atvinnulífs,“ segir í grein útgefendanna sem lesa má í heild sinni í Morgunblaðinu.