Þekkja hverja einustu Fortitude-senu og flykkjast á Reyðarfjörð

Jónas Helgason veitingamaður hóf rekstur Tærgesen veitinga- og gistihúss ásamt konu sinni, Söndru Þorbjörnsdóttur, árið 2009. Jónas og Sandra hafa nokkra sérstöðu meðal gistihúsarekenda á Austfjörðum en Tærgesen-húsið lék stórt hlutverk í fyrstu tveimur þáttaröðum Fortitude. Húsið var hluti af leikmynd þáttanna og þá gistu tökulið og leikarar auk þess á gistiheimili hjónanna þegar tökur stóðu yfir á Reyðarfirði árin 2014 og 2016.

Fortitude-þættirnir, sem sýndir hafa verið á RÚV, eru Íslendingum eflaust mörgum kunnugir en þættirnir fjalla um hrottalegt morð sem skekur íbúa þorps á norðurhjara veraldar. Þá var fréttaflutningur af leikurum þáttanna áberandi þegar þeir komu hingað til lands í tökur á sínum tíma.

Sjá einnig: Dennis Quaid keypti Valentínusargjöf fyrir konuna á Íslandi

Nördar sem þekkja hverja einustu senu

Jónas segir það mjög algengt að forfallnir Fortitude-aðdáendur geri sér sérstaklega ferð á Reyðarfjörð og gisti á Tærgesen vegna dálætis síns á þáttunum.

„Já, við fáum reglulega til okkar fólk sem kemur eingöngu út af þessum þáttum og fólk sem er jafnvel nördar, þekkja allar senur og alla þætti út í gegn,“ segir Jónas.

Hann segir þó erfitt að meta fjölda Fortitude-ferðamanna sem gist hafa á Tærgesen, margir gefi sig á tal við þau hjónin og segi frá ferðinni og Fortitude-áhuganum en aðrir aðdáendur þáttanna komi og segi ekki neitt. Jónas gerir þó ráð fyrir að um sé að ræða töluverðan fjölda fólks. Þegar blaðamann bar að garði á Tærgesen í lok apríl síðastliðnum var þar einmitt erlent par í gistingu á Tærgesen sem hafði lagt leið sína á Reyðarfjörð vegna þáttanna.

Sjá einnig: Tökur á Fortitude líkt og vertíð fyrir Fjarðabyggð

Þá voru nýlega byggð 22 ný mótelherbergi rétt fyrir ofan upprunalega Tærgesen-húsið sem tekin voru í notkun sumarið 2013. Jónas segir téða Fortitude-nörda þó marga aðeins vilja gista í gamla húsinu. „Þeir vilja fá þetta beint í æð.“

Reyðarfjörður skákaði Noregi og Kanada

Jónas segir auk þess að líflegt hafi verið á Tærgesen þegar tökulið þáttanna gisti þar árið 2014 og 2016. Stórleikarinn Dennis Quaid hélt t.d. tónleika fyrir viðstadda eitt kvöldið á Tærgesen og þá kynntist Jónas leikmyndahönnuðinum Gemmu Jackson sem sá um leikmyndina í Fortitude. Að sögn Jónasar hafði Gemma ásamt teymi sínu kannað fjölmarga vænlega tökustaði áður en Reyðarfjörður varð á endanum fyrir valinu.

„Þau voru búin að fara til Kanada, Bandaríkjanna, Noregs og svo komu þau hingað. Þá segir hún, heyrðu hérna tökum við upp,“ segir Jónas.

„Ég var búinn að vera aðeins að spjalla við þessa dömu,  hún gisti hérna hjá okkur, svo frétti ég það bara löngu seinna að þetta væri heimsfræg manneskja sem hefur unnið haug af Emmy-verðlaunum. Hún er ábyrg fyrir leikmyndinni í Game of Thrones,“ bætir Jónas við en hluti Game of Thrones-þáttaraðarinnar var einmitt tekinn upp á Íslandi, eins og frægt er orðið.

Framleiðendur Fortitude leituðu þó á önnur mið í þriðju og síðustu seríu þáttanna en hún er tekin upp í myndveri á Bretlandi.

Vill fleiri ferðamenn í stillur og norðurljós á veturna

Dreifing ferðamanna um Ísland hefur verið nokkuð milli tannanna á fólki fyrir komandi sveitarstjórnarkosningar. Íbúar á Austurlandi hafa þannig kvartað yfir því að ferðamenn skili sér ekki í landshlutann og Jónas tekur undir það.

„Það vantar náttúrulega ferðafólk hérna fyrir austan, utan háannatíma, og maður vill sjá meira gert til þess að fá fólk hingað,“ segir Jónas.

„Hérna er nóg pláss og hægt að labba um án þess að troða öðrum um tær. Þótt það sé gífurlega fallegt hérna á sumrin er líka ofsalega fallegt hér á veturna, miklar stillur, norðurljós og allur pakkinn.“