Segja bann við umskurði ógna trúfrelsi á Íslandi

Tekist var á um það á ráðstefnu í Reykjavík í dag hvort bann við umskurði drengja væri brot á mannréttindum og trúfrelsi eða ekki og hvort heilbrigðissjónarmið eða trúarsjónarmið ættu ein að ráða hvort slíkar aðgerðir væru framkvæmdar. Fulltrúar á ráðstefnunni komu víða að úr heiminum.

Það gerist ekki oft að gyðingar og múslimar sameinist um mál, hvað þá hér uppi á Íslandi. En það gerðist í Norræna húsinu í dag þegar fulltrúar gyðinga og múslima sem og kristinna safnaða víðs vegar að úr heiminum komu saman til að ræða umskurð drengja.

Jonathan Arkhus einn fulltrúa gyðinga á ráðstefnu samráðsvettvangs trúfélaga og lífsskonunarfélaga á Íslandi sagði það alvarlegt mál fyrir dreng í gyðingatrú að vera ekki umskorinn sem venjulega er gert á áttunda degi. Þetta gæti kallað á félagslega einangrun og sársaukafyllri og áhættumeiri umskurð þegar drengurinn næði aldri til að ákveða sjálfur að fara í þessa aðgerð.

„Foreldrar ákveða hvað þjóni best hagsmunum barna þeirra. Gyðingar skera sig ekki úr öðrum hópum hvað það varðar. Við eigum kerfi gilda og menningu sem er fjögur þúsund ára gömul og við ætlum ekki að gefa þau svo auðveldlega eftir,“ segir Arkhus.

Í múhameðstrú eru drengir eldri þegar umskurður fer fram en oftast innan eins árs. Imam Ahmad Seddeeq fulltrúi Menningarmiðstöðvar múslima á Íslandi segir umskurðinn hluta af heildartrúarsetningu múslima.

„Við trúum að við eigum að svara þessu kalli frá Guði og láta sérfræðinga umskera börnin okkar (drengi) undir eftirliti heilbrigðiskerfisins,“ segir Seddeeq.

Saman eru fulltrúar þessara trúarbragða sammála um að ef umsurður af trúarástæðum yrði bannaður á Íslandi þrengdi það að trúfrelsi í landinu.

Geri ekki aðgerðir án læknisfræðilegrar ástæðu

Ólafur Þór Gunnarsson þingmaður og læknir og einn flutningsmanna frumvarps níu þingmanna úr Framsóknarflokki, Vinstri grænum, Pírötum og Flokki fólksins leggst gegn umskurði sem ekki er af heilsufarsástæðum. Hann er sannfærður um að Alþingi muni með einhverjum hætti afgreiða frumvarpið. Það sé kannski það fallegasta við lýðræðishefðir á íslandi að allar athugasemdir séu skoðaðar.

„Ég er þeirrar skoðunar að við eigum aldrei að gera aðgerðir, hvorki á börnum né öðrum, án þess að það séu læknisfræðilegar ástæður til þess. Ég hef hins vegar líka mjög mikinn skilning á ástæðum þeirra sem hafa tiltekna trú og vilja að þeirra siðir og hefðir fái að ríkja,“ segir Ólafur Þór.

Hann telji samtal eins og á ráðstefnunni í dag geti orðið til þess að menn nái saman um einhverja niðurstöðu í málinu. Komi hún fram muni hann fagna því.

Viðtölin við Jonathan Arkush, Imam Ahmad Seddeeq og Ólaf Þór Gunnarsson má sjá í heild sinni í spilaranum hér fyrir neðan.