Enn eitt tapið hjá Serbíu í aðdraganda EM

Serbía hefur átt erfitt uppdráttar í undirbúningi sínum fyrir EM í handbolta og tapaði fyrir Slóveníu í vináttulandsleik í gær, 36-32.

Serbar misstu mikilvæga menn í meiðsli skömmu fyrir mót en Strahinja Milic, Momir Rnic, Ilija Abutovic og Rastko Stojkovic verða allir fjarverandi á EM í Króatíu, sem hefst á föstudag.

Serbar töpuðu fyrir Makedóníumönnum í síðustu viku og lutu einnig í lægra hald fyrir Sviss og Rúmeníu í upphafi undirbúnings síns fyrir mótið.

Ísland er í riðli með Serbíu á EM í Króatíu, sem og Svíum og heimamönnum í Króatíu. Þrjú lið komast áfram úr riðlinum og mætast Íslendingar og Serbar í lokaumferð riðlakeppninnar.

Strákarnir okkar unnu æfingaleik gegn Japan í upphafi ársins en steinlágu svo í tveimur leikjum gegn Þýskalandi um helgina.

Ísland hefur leik gegn Svíum á föstudag klukkan 17.15.